ЕРУЗАЛІМ. Кіраўнік Палястынскай аўтаноміі Ясір Арафат назваў злачынствам адмову Ізраілю прапусьціць яго праз тэрыторыю краіны ў горад Бітлеем, дзе ён зьбіраўся, як і ў апошнія сем гадоў, прысутнічаць на каляднай імшы.
Разам з тым, Арафат адзначыў, што гэтае рашэньне Ізраілю не паўплывае на імкненьне палястынскага кіраўніцтва дасягнуць устойлівага міру ў рэгіёне.
Раней прэм’ер-міністар Ізраілю Арыэль Шарон заявіў, што Арафата прапусьцяць у Бітлеем, як толькі будуць арыштаваныя забойцы ізраільскага міністра Рэхавема Зээві.
Рашэньне ізраільскага кіраўніцтва ня выпусьціць Арафата з гораду Рамалах на Заходнім беразе Ярдану выклікала адмоўную рэакцыю як у самім Ізраілі, гэтак і па-за яго межамі, у тым ліку, і ў Ватыкану.
У панядзелак на Заходнім беразе Ярдану баявікі з групоўкі “Фатх”, што падпарадкоўваецца Арафату, цяжка паранілі гэбрайскага пасяленца. Яны зрабілі заяву, што помсьцілі за рашэньне Ізраілю не дапушчаць іхнага лідэра ў Бітлеем.
