Паводле інфармацыі старшыні юдэйскага аб’яднаньня Беларусі Юрыя Дорна, на гэтых могілках пахавана каля 14 тысячаў чалавек. Юдэйскае аб’яднаньне лічыць недапушчальным пабудову падмурку стадыёну з надмагільных камянёў і выкарыстаньне для будоўлі зямлі, у якой ляжаць людзкія косьці. Паводле Юрыя Дорна, перамовы на гэты конт паміж кіраўніцтвам Гарадзенскай вобласьці і галоўным рабінам Беларусі Сэндэрам Урыцкім не прывялі да згоды. Старшыня юдэйскага аб’яднаньня заявіў, што гэтая непавага да рэлігійных і гістарычных сьвятыняў прымусіла шэраг габрэйскіх арганізацыяў зьвярнуцца да міжнароднай і эўрапейскай футбольных фэдэрацыяў з заклікам байкатаваць беларускіх футбалістаў. Паводле Юрыя Дорна, шэраг кангрэсмэнаў ЗША вырашыў зьвярнуцца ў міжнародны алімпійскі камітэт з заклікам байкатаваць Беларусь на наступных алімпійскіх гульнях, калі пабудова стадыёну ў Горадні на месцы могілак ня будзе спыненая.
Аднак варта адзначыць, што не паўсюль стаўленьне ўладаў да гістарычнай спадчыны, прынамсі, габрэйскай, такое, як у Горадні. На той жа Гарадзеншчыне, у Лідзе сёньня адчыняецца помнік лідзкім і віленскім габрэям, якія загінулі падчас другой усясьветнай вайны. Помнік усталяваны на адным зь месцаў пахаваньня ахвяр Галакосту — у Паўночным гарадку Ліды. Падчас нацысцкай акупацыі акупацыі Беларусі ў Лідзе было забіта больш за 8 тысяч габрэяў.