Газэту “Навінкі” ў Вышэйшым гаспадарчым судзе рэпрэзэнтавала адвакатка Тацяна Станкевіч. Міністэрства інфармацыі вынесла газэце папярэджаньне пасьля атрыманьня адмысловага прадстаўленьня генэральнай пракуратуры. На думку прадстаўнікоў рэдакцыі “Навінак”, ні ў дакумэнце пракуратуры, ні ў дакумэнце Міністэрства інфармацыі ня ўтрымліваецца канкрэтыкі — што менавіта можа пагражаць маральнасьці беларускіх грамадзянаў. Кажа галоўны рэдактар газэты Паўлюк Канавальчык:
(Канавальчык: ) “Прадстаўленьне пракуратуры, на якое спасылаецца Міністэрства інфармацыі, ня ўтрымлівае дакладнага ўказаньня на гэтыя публікацыі”.
Прадстаўніца Міністэрства інфармацыі Лілія Богдан прадэманстравала прысутным у залі судовых паседжаньняў копіі спрэчных артыкулаў. Хаця газэта “Навінкі” цалкам беларускамоўная, у двух загалоўках ужытыя два расейскія словы: адно старое гутарковае, другое з сучаснага слэнгу.
Адвакатка Тацяна Станкевіч прывяла ў прыклад шэраг назваў літаратурных ды кінатвораў, дзе ўжываюцца значна больш грубыя словы, чым тыя, што ўжытыя ў “Навінках”:
(Станкевіч: ) “Вельмі шырока ўжываецца ў кінафільмах, які праглядаюць усе ад малога да вялікага ў гэтай краіне. Якія ідуць па Беларускай тэлевізіі ды іншых”.
Паколькі спрэчныя словы запазычаныя з расейскае мовы, у часе судовага разьбіральніцтва зьвярнуліся да тлумачальнага слоўніка расейскае мовы. Таксама да справы далучылі меркаваньне спэцыяліста: доктара філялёгіі і экспэрта Беларускага ПЭН-Цэнтру Міхася Тычыны. Рэзюмэ заключэньня Міхася Тычыны перагукаецца зь меркаваньнем Тацяны Станкевіч:
(Станкевіч: ) “Тое, што дапушчальнае ў моладзевым асяродку, будзе недапушчальнае й амаральнае ў асяродку людзей сталых. Таму казаць у прынцыпе пра парушэньне маральнасьці ў дадзеным загалоўку, на мой погляд, нельга”.
Але судзьдзя Рагавец не прыняў гэтых аргумэнтаў. Ці адновіцца выхад газэты “Навінкі” пасьля 23 жніўня, залежыць ад Міністэрства інфармацыі.