Гарадзкая пракуратура праводзіла сьледзтва па гэтай справе амаль чатыры гады. Як вынік, матэрыялаў справы — каля 200 тамоў. Галоўных абвінавачаных не ўзялі пад варту. Яны мусяць самі прыходзіць ў гарадзкі суд, каб даваць паказаньні.
Сярод тых, хто фігуруе ў сьпісе абвінавачаных — галоўны бугальтар фірмы “RAS”, прэзыдэнт даччынай фірмы “Пушэ-агра”, прэзыдэнт закрытага акцыянэрнага таварыства “Пушэ”, прэзыдэнт “БЕЛМЕДу” й генэральны дырэктар таварыства з абмежаванай адказнасьцю “Фік–Фіко”.
Крымінальная справа спадарства Пупейкі ды Чарнышэвіча вылучаная ў асобную справу з прычыны іхнай адсутнасьці. Пракуратура абвінавачвае іх у вымантачваньні крэдытаў у “Белаграпрамбанку” на 3 мільёны даляраў ды ў выкраданьні маёмасьці шляхам растраты.
Пракуратура настойвае, што гэтыя злачынствы ўчыніла арганізаваная група, таму (калі суд пацьвердзіць) прысуд можа быць даволі жорсткім — ад 8 да 15 гадоў пазбаўленьня волі з канфіскацыяй маёмасьці.
Абвінавачваньне выстаўляе таксама артыкул 150 Крымінальнага кодэксу, які быў прыняты Вярхоўным саветам у 1993 годзе й ратыфікаваны 1 сакавіка 1994 году. Тады дэпутаты намагаліся прыняць артыкул, які б прадугледжваў адказнасьць за вымантачваньне крэдытаў, чаго раней не было ў Крымінальным кодэксе. Пакараньне паводле гэтага артыкула прадугледжвае да 2 гадоў пазбаўленьня волі бяз права цягам 5 гадоў весьці справы ў гэтай сфэры.
Паводле новага Крымінальна-працэсуальнага кодэксу, пракурор на судовым паседжаньні не зачытвае абвінаваўчага заключэньня. Ён вядзе працэс, даводзіць учыненае злачынства, а судзьдзя самастойна робіць высновы. Гэтая справа складае 200 тамоў, таму адвакаты ставяцца вельмі скептычна да магчымасьці хуткага вынясеньня прысуду.