Замест абвержаньня інфармацыі Беларускае тэлевізіі пра заклік увесьці санкцыі супраць Беларусі, што нібыта зрабіў былы амбасадар ЗША ў Менску Дэніэл Спэкгард у часе прамовы ў нямецкім горадзе Гарміш-Партэнкірхэне, амэрыканская амбасада атрымала афіцыйнае пацьверджаньне гэтай інфармацыі старшынём КГБ. Кіраўнік групы АБСЭ ў Менску Ганс-Георг Вік заявіў радыё Свабода, што кампанія паклёпу працягваецца. Беларуская тэлевізія, якое паказала фрагмэнт прамовы старшыні КГБ Леаніда Ерына з новымі абвінавачваньнямі на адрэсу амэрыканскіх дыпляматаў, чамусьці не паведаміла, што спадар Ерын падтрымаў і ранейшыя тэлевізійныя атакі. У мінулую пятніцу БТ абвесьціла, што колішні амбасадар ЗША ў Менску Дэніэл Спэкгард, выступаючы ў Цэнтры Маршала ў баварскім горадзе Гарміш-Партэнкірхэне, нібыта заклікаў ЭўраЗьвяз да санкцыяў супраць Беларусі. Амэрыканская амбасада ў Менску катэгарычна абвергла гэтае паведамленьне, назваўшы яго "суцэльнай хлусьнёй" ды падкрэсьліўшы, што спадар Спэкгард цягам апошніх трох год у Гарміш-Партэнкірхэне ня быў. Аднак учора кіраўнік КГБ афіцыйна заявіў, што заява Спэкгарда ў Цэнтры Маршала (цытую агэнцыю "Интерфакс") "мела месца". Такім чынам, КГБ абвяргае зробленае амэрыканцамі абвержаньне. Я патэлефанаваў у амбасаду ЗША ў Менску ды спытаў, ці будзе новае абвяржэньне. (Саламаха: ) "Мы яшчэ раз скіроўваем Вас да той заявы, якія была зробленая амбасадай, і якая была заснаваная на непасрэдным кантакце з паслом Спэкгардам. У заяве, якую амбасада выдала дзень таму, мы казалі аб тым, што пасол Спэкгард ніколі не рабіў тых заяваў, якія былі яму прыпісаныя". Паведаміў Аляксей Саламаха, супрацоўнік інфармацыйнае службы амэрыканскае амбасады ў Менску. А вось як адрэагаваў на прамову старшыні КГБ кіраўнік Кансультацыйна-назіральнае групы АБСЭ ў Беларусі Ганс-Георг Вік, які ўжо вярнуўся ў Менск. (Вік: ) "Кампанія паклёпу, што мела месца ў мінулы ўікэнд, зараз працягваецца. Я магу сказаць яшчэ раз — Кансультацыйна-назіральная група АБСЭ, паводле заяваў дзейнага старшыні АБСЭ ды ейнае сталае рады, выконвае свой мандат і не парушае яго", — заявіў амбасадар Вік. На маю просьбу пракамэнтаваць заяву першага намесьніка кіраўніка прэзыдэнцкай адміністрацыі Ўладзімера Замяталіна пра тое, што "АБСЭ мусіць садзейнічаць урадам, уладам у выкананьні міжнародных правілаў, законаў, а не аказваць дапамогу падрыўным арганізацыям, апазыцыі для расхістваньня ўлады", Ганс-Георг Вік адказаў гэтак: (Вік: ) "Заява ня ёсьць слушнаю, бо наш мандат — дапамагаць у разьвіцьці дэмакратычных інстытутаў ды назіраць за адпаведнасьцю краіны ейным міжнародным забавязаньням". Я таксама спытаў амбасадара Віка, ці ёсьць нейкая розьніца паміж абвіначваньнямі з боку Беларускае тэлевізіі ды з боку Камітэту дзяржаўнае бясьпекі… (Вік: ) "У структуры гэтае краіны, дзе тэлевізія кантралюецца дзяржаваю ды знаходзіцца ва ўласнасьці дзяржавы, розьніцы няма", — мяркуе кіраўнік групы АБСЭ ў Беларусі. На маё пытаньне, ці можа ён пацьвердзіць, што неўзабаве адбудзецца ягоная сустрэча зь міністрам замежных справаў Міхалам Хвастовым, амбасадар Вік адказаў гэтак: (Вік: ) "Гэта натуральная рэч — мая сустрэча з новым міністрам замежных справаў. Я папрасіў пра сустрэчу ў той самы момант, калі яго прызначылі". Але Ганс-Георг Вік адмовіўся паведаміць, калі менавіта пройдзе такая сустрэча ды якія пытаньні пад час яе могуць абмяркоўвацца…
Замест абвержаньня інфармацыі Беларускае тэлевізіі пра заклік увесьці санкцыі супраць Беларусі, што нібыта зрабіў былы амбасадар ЗША ў Менску Дэніэл Спэкгард у часе прамовы ў нямецкім горадзе Гарміш-Партэнкірхэне, амэрыканская амбасада атрымала афіцыйнае пацьверджаньне гэтай інфармацыі старшынём КГБ. Кіраўнік групы АБСЭ ў Менску Ганс-Георг Вік заявіў радыё Свабода, што кампанія паклёпу працягваецца. Беларуская тэлевізія, якое паказала фрагмэнт прамовы старшыні КГБ Леаніда Ерына з новымі абвінавачваньнямі на адрэсу амэрыканскіх дыпляматаў, чамусьці не паведаміла, што спадар Ерын падтрымаў і ранейшыя тэлевізійныя атакі. У мінулую пятніцу БТ абвесьціла, што колішні амбасадар ЗША ў Менску Дэніэл Спэкгард, выступаючы ў Цэнтры Маршала ў баварскім горадзе Гарміш-Партэнкірхэне, нібыта заклікаў ЭўраЗьвяз да санкцыяў супраць Беларусі. Амэрыканская амбасада ў Менску катэгарычна абвергла гэтае паведамленьне, назваўшы яго "суцэльнай хлусьнёй" ды падкрэсьліўшы, што спадар Спэкгард цягам апошніх трох год у Гарміш-Партэнкірхэне ня быў. Аднак учора кіраўнік КГБ афіцыйна заявіў, што заява Спэкгарда ў Цэнтры Маршала (цытую агэнцыю "Интерфакс") "мела месца". Такім чынам, КГБ абвяргае зробленае амэрыканцамі абвержаньне. Я патэлефанаваў у амбасаду ЗША ў Менску ды спытаў, ці будзе новае абвяржэньне. (Саламаха: ) "Мы яшчэ раз скіроўваем Вас да той заявы, якія была зробленая амбасадай, і якая была заснаваная на непасрэдным кантакце з паслом Спэкгардам. У заяве, якую амбасада выдала дзень таму, мы казалі аб тым, што пасол Спэкгард ніколі не рабіў тых заяваў, якія былі яму прыпісаныя". Паведаміў Аляксей Саламаха, супрацоўнік інфармацыйнае службы амэрыканскае амбасады ў Менску. А вось як адрэагаваў на прамову старшыні КГБ кіраўнік Кансультацыйна-назіральнае групы АБСЭ ў Беларусі Ганс-Георг Вік, які ўжо вярнуўся ў Менск. (Вік: ) "Кампанія паклёпу, што мела месца ў мінулы ўікэнд, зараз працягваецца. Я магу сказаць яшчэ раз — Кансультацыйна-назіральная група АБСЭ, паводле заяваў дзейнага старшыні АБСЭ ды ейнае сталае рады, выконвае свой мандат і не парушае яго", — заявіў амбасадар Вік. На маю просьбу пракамэнтаваць заяву першага намесьніка кіраўніка прэзыдэнцкай адміністрацыі Ўладзімера Замяталіна пра тое, што "АБСЭ мусіць садзейнічаць урадам, уладам у выкананьні міжнародных правілаў, законаў, а не аказваць дапамогу падрыўным арганізацыям, апазыцыі для расхістваньня ўлады", Ганс-Георг Вік адказаў гэтак: (Вік: ) "Заява ня ёсьць слушнаю, бо наш мандат — дапамагаць у разьвіцьці дэмакратычных інстытутаў ды назіраць за адпаведнасьцю краіны ейным міжнародным забавязаньням". Я таксама спытаў амбасадара Віка, ці ёсьць нейкая розьніца паміж абвіначваньнямі з боку Беларускае тэлевізіі ды з боку Камітэту дзяржаўнае бясьпекі… (Вік: ) "У структуры гэтае краіны, дзе тэлевізія кантралюецца дзяржаваю ды знаходзіцца ва ўласнасьці дзяржавы, розьніцы няма", — мяркуе кіраўнік групы АБСЭ ў Беларусі. На маё пытаньне, ці можа ён пацьвердзіць, што неўзабаве адбудзецца ягоная сустрэча зь міністрам замежных справаў Міхалам Хвастовым, амбасадар Вік адказаў гэтак: (Вік: ) "Гэта натуральная рэч — мая сустрэча з новым міністрам замежных справаў. Я папрасіў пра сустрэчу ў той самы момант, калі яго прызначылі". Але Ганс-Георг Вік адмовіўся паведаміць, калі менавіта пройдзе такая сустрэча ды якія пытаньні пад час яе могуць абмяркоўвацца…