Сёньня спаўняецца дзесяць гадоў зь дня ўсталяваньня партнэрскіх і сяброўскіх
дачыненьняў паміж Полацакам і нямецкім местам Фрыдрыхсгафэн. З гэтай нагоды
на Полаччыну прыехала прадстаўнічая нямецкая дэлегацыя на чале з намесьнікам
обэр-бургамістра Фрыдрыхсгафэну доктарам Зігам. Палачане гасьцінна сустрэлі
сяброў, падрыхтавалі для іх багатую культурніцкую праграму, аднак зьязджалі
немцы ня ў самым лепшым настроі.
Прымалі нямецкую дэлегацыю, у склад якой уваходзіла 15 чалавек, надзвычай
гасьцінна. Пра гэта паведаміў у часе афіцыйнай сустрэчы у полацкім гарвыканкаме
доктар Зіг. Кіраўнік дэлегацыі адзначыў таксама, што Полацак і Фрыдрыхсгафэн
заснаваны прыкладна ў адзін і той жа час, гарады шмат бачылі на сваім
вяку, і таму папаросту абавязаныя сябраваць. Немцы прыехалі не з пустымі
рукамі, і па старой завядзёнцы прыгналі ў якасьці падарунка чатыры легкавых
аўтамашыны і прывезьлі мэдабсталяваньне, а таксама харчовыя прадукты, і
цяпер кожны палачанін атрымае ад сваіх нямецкіх сяброў чакалядку і бутэльку
алею.
Заўважым, што падобныя падарункі робіць штогод Фрыдрыхсгафэнскі бізнэсовец
доктар Фрэнкель, які колісь ваяваў на Беларусі ў складзе Вэрмахту, а сёньня
з пачуцця віны ці са спагады да беларусаў шле ім алеі і чякаляды. Прывезьлі
нямецкія сябры і 9.000 дойчмарак, пры гэтым 5.000 яны перадалі школе-інтэрнату,
а 4.000 хацелі раздать палачанам, якія церпяць нястачу. На мінулые Каляды
немцы ўжо рабілі падобную акцыю і ўласнаручна перадалі старым і нямоглым
людзям па 25 марак. Цяпер па 20 марак павінны былі атрымаць 200 палачанаў,
аднак раздаць грошы ня лёсіла, таму што ў справу ўмяшаліся прадстаўнікі
падаткавых ворганаў. Яны растлумачылі гасьцям, што, паводле дзейнага заканадаўства,
дойчмаркі трэба абмяняць па афіцыйным курсе на беларускія рублі, выплаціць
з гэтай сумы падаходны падатак, і толькі потым грошы можна раздаць людзям.
Пачуўшы такое, немцы не хавалі свайго зьдзіўленьня. Яны паспрабавалі
растлумачыць, што гэта дарунак, які не павінен абкладацца падаткам, і ў
адказ пачулі, што дзеля дарунку трэба аформіць афіцыйныя паперы на кожнага
з 200 грамадзянаў, а паколькі такіх папераў няма, падатак мусіць быць сплачаны.
Учора нямецкая дэлегацыя зьехала на Радзіму, даручыўшы раздачу грошай
мясцоваму аддзелу сацыяльнай абароны.
Вінцэcь Мудроў
Наваполацак
Наваполацак