Завяршыўся афіцыйны візыт у Беларусь італьянскага прэм’ер-міністра Сыльвіё Бэрлюсконі. Гэта першы прыезд заходнеэўрапейскага палітыка такога рангу ў Менск за ўсе 15 гадоў прэзыдэнцтва Лукашэнкі.
У Менску адбыліся перамовы Бэрлюсконі з Аляксандрам Лукашэнкам. Візыт доўжыўся каля трох-чатырох гадзін, падпісныя тры дамовы.
«Я жадаю ўдачы асабіста вам, спадар прэзыдэнт, вашаму народу, народу, які вас па-сапраўднаму любіць, сьведчаньнем чаму зьяўляюцца вынікі выбараў, якія перад вачамі ўсіх нас», — сказаў Сыльвіё Бэрлюсконі Аляксандру Лукашэнку пасьля завяршэньня двух раўндаў перамоваў.
Нагадаем, апошнія прэзыдэнцкія выбары ў Беларусі былі прызнаныя Парлямэцкай асамблеяй Рады Эўропы недэмакратычнымі, а вынікі выбараў — сфальшаванымі.
Лукашэнка ў адказ заявіў, што Беларусь і Італія адкрылі новы этап партнэрства, «фундамэнтам якога зьяўляецца ўзаемапаважлівы, шчыры і зацікаўлены дыялёг кіраўніцтва дзьвюх краін».
Аднак такія палітычныя заявы хутчэй выключэньне. У цэлым гутарка Сыльвіё Бэрлюсконі і Аляксандра Лукашэнкі вялася ў прагматычным ключы. Па яе выніках урад Беларусі і італьянская кампанія «Фінмэканіка» падпісалі мэмарандум аб супрацоўніцтве ў сфэры транспарту, энэргетыкі , космасу, бясьпекі. Апрача таго ўрады падпісалі пагадненьне аб эканамічным супрацоўніцтве і аб супрацоўніцтве ў галіне вэтэрынарыі.
«Мы можам зрабіць у нашых адносінах нашмат, нашмат болей, заявіў Бэрлюсконі на пачатку сустрэчы. У прыватнасьці Італія магла б стварыць місію сваіх прадпрымальнікаў у Беларусі і магла б падзяліцца тэхналёгіямі хуткага домабудаўніцтва. Місію прадпрымальнікаў гатовы ўзначаліць сам Бэрлюсконі.
Аляксандар Лукашэнка ў адказ заявіў:
«Мы ўспрымаем прыезд кіраўніка ўраду Італіі як вельмі красамоўны жэст падтрымкі Беларусі на міжнароднай арэне». Паводле ягоных словаў, Італія стала для Беларусі значным палітычным і эканамічным, прычым «прывілеяваным» партнэрам.
Бэрлюсконі канстатаваў, што адносіны Італіі зь Беларусьсю знаходзяцца ніжэй плянкі існуючых магчымасьцяў, зазначыўшы, што ягоная краіна знаходзіцца толькі на 15-м месцы па інвэстыцыях у беларускую эканоміку.
«Дасягнутыя дамоўленасьці дазволяць італьянскім прадпрымальнікам зрабіць больш упэўненыя крокі ў Беларусі», — цытуе Бэрлюсконі «Інтэрфакс».
Асабліва ён падкрэсьліў дамоўленасьць беларускага ўрада з групай «Фінмэканіка» і прапанову Беларусі стварыць у Берасьці «італьянскую прамысловую акругу» для сумесных прадпрыемстваў, якія прадавалі б сваю прадукцыю на тэрыторыі Мытнага саюза Расеі, Беларусі і Казахстана.
Магчымасьць абмеркаваньня падчас візыту праблемаў палітычнай лібэралізацыі Беларусі яшчэ да прыезду Бэрлюсконі адхіліў Аляксандар Лукашэнка. Адказваючы на пытаньне журналіста італьянскай газэты La Stampa пра гарантыі ў пляне дэмакратызацыі, якія Беларусь магла б даць Сыльвіё Бэрлюсконі, Лукашэнка сказаў: «Ня думаю, што Сыльвіё едзе сюды па нейкія гарантыі дэмакратызацыі. Што да дэмакратыі, мы можам яшчэ зь сім-тым падзяліцца гэтым дарам».
Беларускае кіраўніцтва наўпрост выказала зацікаўленасьць перш за ўсё ў эканамічных праектах супрацы з Італіяй.
Па выніках 9 месяцаў гэтага году Італія знаходзілася на 7-м месцы паводле таваразвароту зь Беларусьсю, які склаў 612 мільёнаў даляраў. Беларускі экспарт у Італію сёлета істотна ўпаў з-за глябальнага крызісу.
Лідэр Аб’яднанай грамадзянскай партыі Анатоль Лябедзька выказаў перакананьне, што Бэрлюсконі дэманструе ў Менску палітыку эўрапейскага прагматызму, а не эўрапейскіх каштоўнасьцяў. Спадар Лябедзька раней меў магчымасьць асабіста сустрэцца і пагутарыць з Сыльвіё Бэрлюсконі і мае асабістае ўражаньне ад ягонай асобы:
«Бэрлюсконі — эпатажны палітык. Паводле чалавечых якасьцяў ён у чымсьці нават падобны на А. Лукашэнку, таксама схільны да палітычнага авантурызму. На мой погляд, так, да нас прыяжджае лідэр адной з краін Эўрапейскага Зьвязу, але палітык-бізнэсмэн. Для Бэрлюсконі ўсё зьяўляецца таварам, які мае свой кошт, у тым ліку і эўрапейскія каштоўнасьці».
Анатоль Лябедзька мяркуе, што ў Эўропе некаторыя палітыкі зацікаўленыя, каб хтосьці першы пратаптаў сьцяжынку ў менскі «Чырвоны дом».
Прадстаўнік руху «За свабоду» Алесь Лагвінец назваў візыт Бэрлюсконі адлюстраваньнем таго дыялёгу, які Эўразьвяз спрабуе разьвіваць зь Беларусьсю і ў якім Італія стала ў першыя шэрагі.
«Пазыцыя прэм’ер-міністра Італіі цяпер ня самая моцная. Літаральна ад заўтра яго чакаюць вялікія праблемы ў сваёй краіне, гэта тычыцца як ягонай маёмасьці, гэтак і ягоных стасункаў з прэсай, абвінавачваньнямі ў карупцыі... Цяжка казаць, што візыт італьянскага прэм’ера зможа істотна паўплываць на сытуацыю з правамі чалавека і палітычную лібэралізацыю ў Беларусі. Паводле заяваў як міністра замежных спраў Італіі, так і самога Бэрлюсконі, гэтыя пытаньні для іх не зьяўляюцца першачарговымі».
Палітоляг Андрэй Фёдараў ня лічыць візыт Бэрлюсконі нейкім прарывам у адносінах Беларусі і Захаду.
«Эўразьвяз — гэта ня тая арганізацыя, у якой адзін чалавек, нават лідэр такой уплывовай краіны, як Італія, можа прымаць нейкія рашэньні. Тым больш мы ведаем што Бэрлюсконі — даволі экстравагантны чалавек, і ў ягонай краіне ў яго ёсьць пэўныя праблемы, зьвязаныя з гэтым. Такім чынам, я думаю, што прынцыпова ў адносінах з Эўразьвязам гэта нічога ня зьменіць. Іншая справа, што, магчыма, у двухбаковых адносінах могуць зьявіцца больш-менш значныя дасягненьні».
Андрэй Фёдараў нагадаў, што пасьля візыту прэзыдэнта ЗША Біла Клінтана ў Менск у студзені 1994 году тут не было лідэраў краінаў Захаду. Спадар Фёдараў мяркуе, што ня варта чакаць, што пасьля прыезду Бэрлюсконі іншыя заходнія лідэры ўключаць Менск у свае пляны паездак. Астатнія будуць больш асьцярожнымі. Тое, што санкцыі ЭЗ былі прадоўжаныя, сьведчыць, што Эўропа насьцярожана ставіцца да падзеяў, якія тут адбываюцца.
«Я жадаю ўдачы асабіста вам, спадар прэзыдэнт, вашаму народу, народу, які вас па-сапраўднаму любіць, сьведчаньнем чаму зьяўляюцца вынікі выбараў, якія перад вачамі ўсіх нас», — сказаў Сыльвіё Бэрлюсконі Аляксандру Лукашэнку пасьля завяршэньня двух раўндаў перамоваў.
Нагадаем, апошнія прэзыдэнцкія выбары ў Беларусі былі прызнаныя Парлямэцкай асамблеяй Рады Эўропы недэмакратычнымі, а вынікі выбараў — сфальшаванымі.
Лукашэнка ў адказ заявіў, што Беларусь і Італія адкрылі новы этап партнэрства, «фундамэнтам якога зьяўляецца ўзаемапаважлівы, шчыры і зацікаўлены дыялёг кіраўніцтва дзьвюх краін».
Аднак такія палітычныя заявы хутчэй выключэньне. У цэлым гутарка Сыльвіё Бэрлюсконі і Аляксандра Лукашэнкі вялася ў прагматычным ключы. Па яе выніках урад Беларусі і італьянская кампанія «Фінмэканіка» падпісалі мэмарандум аб супрацоўніцтве ў сфэры транспарту, энэргетыкі , космасу, бясьпекі. Апрача таго ўрады падпісалі пагадненьне аб эканамічным супрацоўніцтве і аб супрацоўніцтве ў галіне вэтэрынарыі.
«Мы можам зрабіць у нашых адносінах нашмат, нашмат болей, заявіў Бэрлюсконі на пачатку сустрэчы. У прыватнасьці Італія магла б стварыць місію сваіх прадпрымальнікаў у Беларусі і магла б падзяліцца тэхналёгіямі хуткага домабудаўніцтва. Місію прадпрымальнікаў гатовы ўзначаліць сам Бэрлюсконі.
Аляксандар Лукашэнка ў адказ заявіў:
«Мы ўспрымаем прыезд кіраўніка ўраду Італіі як вельмі красамоўны жэст падтрымкі Беларусі на міжнароднай арэне». Паводле ягоных словаў, Італія стала для Беларусі значным палітычным і эканамічным, прычым «прывілеяваным» партнэрам.
Бэрлюсконі канстатаваў, што адносіны Італіі зь Беларусьсю знаходзяцца ніжэй плянкі існуючых магчымасьцяў, зазначыўшы, што ягоная краіна знаходзіцца толькі на 15-м месцы па інвэстыцыях у беларускую эканоміку.
«Дасягнутыя дамоўленасьці дазволяць італьянскім прадпрымальнікам зрабіць больш упэўненыя крокі ў Беларусі», — цытуе Бэрлюсконі «Інтэрфакс».
Асабліва ён падкрэсьліў дамоўленасьць беларускага ўрада з групай «Фінмэканіка» і прапанову Беларусі стварыць у Берасьці «італьянскую прамысловую акругу» для сумесных прадпрыемстваў, якія прадавалі б сваю прадукцыю на тэрыторыі Мытнага саюза Расеі, Беларусі і Казахстана.
Магчымасьць абмеркаваньня падчас візыту праблемаў палітычнай лібэралізацыі Беларусі яшчэ да прыезду Бэрлюсконі адхіліў Аляксандар Лукашэнка. Адказваючы на пытаньне журналіста італьянскай газэты La Stampa пра гарантыі ў пляне дэмакратызацыі, якія Беларусь магла б даць Сыльвіё Бэрлюсконі, Лукашэнка сказаў: «Ня думаю, што Сыльвіё едзе сюды па нейкія гарантыі дэмакратызацыі. Што да дэмакратыі, мы можам яшчэ зь сім-тым падзяліцца гэтым дарам».
Беларускае кіраўніцтва наўпрост выказала зацікаўленасьць перш за ўсё ў эканамічных праектах супрацы з Італіяй.
Па выніках 9 месяцаў гэтага году Італія знаходзілася на 7-м месцы паводле таваразвароту зь Беларусьсю, які склаў 612 мільёнаў даляраў. Беларускі экспарт у Італію сёлета істотна ўпаў з-за глябальнага крызісу.
Лідэр Аб’яднанай грамадзянскай партыі Анатоль Лябедзька выказаў перакананьне, што Бэрлюсконі дэманструе ў Менску палітыку эўрапейскага прагматызму, а не эўрапейскіх каштоўнасьцяў. Спадар Лябедзька раней меў магчымасьць асабіста сустрэцца і пагутарыць з Сыльвіё Бэрлюсконі і мае асабістае ўражаньне ад ягонай асобы:
«Бэрлюсконі — эпатажны палітык. Паводле чалавечых якасьцяў ён у чымсьці нават падобны на А. Лукашэнку, таксама схільны да палітычнага авантурызму. На мой погляд, так, да нас прыяжджае лідэр адной з краін Эўрапейскага Зьвязу, але палітык-бізнэсмэн. Для Бэрлюсконі ўсё зьяўляецца таварам, які мае свой кошт, у тым ліку і эўрапейскія каштоўнасьці».
Анатоль Лябедзька мяркуе, што ў Эўропе некаторыя палітыкі зацікаўленыя, каб хтосьці першы пратаптаў сьцяжынку ў менскі «Чырвоны дом».
Прадстаўнік руху «За свабоду» Алесь Лагвінец назваў візыт Бэрлюсконі адлюстраваньнем таго дыялёгу, які Эўразьвяз спрабуе разьвіваць зь Беларусьсю і ў якім Італія стала ў першыя шэрагі.
«Пазыцыя прэм’ер-міністра Італіі цяпер ня самая моцная. Літаральна ад заўтра яго чакаюць вялікія праблемы ў сваёй краіне, гэта тычыцца як ягонай маёмасьці, гэтак і ягоных стасункаў з прэсай, абвінавачваньнямі ў карупцыі... Цяжка казаць, што візыт італьянскага прэм’ера зможа істотна паўплываць на сытуацыю з правамі чалавека і палітычную лібэралізацыю ў Беларусі. Паводле заяваў як міністра замежных спраў Італіі, так і самога Бэрлюсконі, гэтыя пытаньні для іх не зьяўляюцца першачарговымі».
Палітоляг Андрэй Фёдараў ня лічыць візыт Бэрлюсконі нейкім прарывам у адносінах Беларусі і Захаду.
«Эўразьвяз — гэта ня тая арганізацыя, у якой адзін чалавек, нават лідэр такой уплывовай краіны, як Італія, можа прымаць нейкія рашэньні. Тым больш мы ведаем што Бэрлюсконі — даволі экстравагантны чалавек, і ў ягонай краіне ў яго ёсьць пэўныя праблемы, зьвязаныя з гэтым. Такім чынам, я думаю, што прынцыпова ў адносінах з Эўразьвязам гэта нічога ня зьменіць. Іншая справа, што, магчыма, у двухбаковых адносінах могуць зьявіцца больш-менш значныя дасягненьні».
Андрэй Фёдараў нагадаў, што пасьля візыту прэзыдэнта ЗША Біла Клінтана ў Менск у студзені 1994 году тут не было лідэраў краінаў Захаду. Спадар Фёдараў мяркуе, што ня варта чакаць, што пасьля прыезду Бэрлюсконі іншыя заходнія лідэры ўключаць Менск у свае пляны паездак. Астатнія будуць больш асьцярожнымі. Тое, што санкцыі ЭЗ былі прадоўжаныя, сьведчыць, што Эўропа насьцярожана ставіцца да падзеяў, якія тут адбываюцца.