Лінкі ўнівэрсальнага доступу

Начная аБЛОГа. 13 сьнежня


Юлія Шарова, Менск Агляд беларускага сеціва.

На форумах парталу TUT.by абмяркоўваюць навіну пра тое, што Аляксандар Мілінкевіч адмовіўся ад грашовай часткі прэміі Сахарава. Вось некалькі камэнтароў:

“Малайчына, вось так крок за крокам трэба усталёўваць свой імідж. Нажаль, да большасці беларусаў гэта інфармацыя ня дойдзе”.

“Пэўны, гэта прэмія ў 1000 разоў больш патрэбная беларускім дзецям, якім патрабуюцца дарагія замежныя апэрацыі. Іх некалькі соцен. “Рэпрэсаваныя” – перадайце прэмію дзецям, людзі дзякую скажуць!”.

“50 тысячаў эўра зь цяжкасьцю хопіць на адно дзіця для, скажам, трансплянтацыі ныркі ў Расеі… Вы лічыце, гэта нейкім чынам можа зьмяніць сытуацыю? Астатнія апэрацыі каштуюць звычайна нашмат даражэй”.

“Вам не падаецца, што тыя сотні мільёнаў даляраў, патрачаныя на будаўніцтва, напрыклад, бібліятэкі, маглі б сапраўды ўратаваць жыцьцё шматлікім няшчасным дзецям?”

На сайце Беларуская жаба зьявіўся цэлы шэраг новых каляжаў на актуальную тэму энэргетычнага крызысу. На адным з каляжаў – здымак новай газавай пліты “Гефест”, а побач – купка дроваў. Подпіс да каляжу: “Набудзь 1 студзеня 2007 году газавую пліту й атрымай падарунак – дровы звычайныя”.

Энэргетычную тэму закранае і блогер Lipkovich “Ёсьць, канечне, простае рашэньне пытаньня з мытам на нафту, якія нам закручвае ўрад Фрадкова: абвесьціць вайну Поўночная Карэі. Вось тады ўсім адразу стане не да жартаў…”

Апроч таго, у беларускім сеціве можна знайсьці шмат рэфлексіяў з нагоды ўчорашняга “Бэніфэсту Анемпадыстава” – нататкі, уражаньні ды нават грунтоўныя справаздачы пра гэтую імпрэзу можна знайсьці ў шматлікіх беларускамоўных блогах і ЖЖ-суполках.

Блогерка v_mariamna у сваім дзёньніку піша: “Упэўненая, што мы павінны ўсьлед за Ўкраінай паставіць пытаньне пра пераклад фільмаў на беларускую мову для паказу ў кінатэатрах. Хто ЗА?” Чытачы ейнага блогу камэнтуюць: “Шмат хто ЗА. На жаль гэта нічога ня зьменіць у бліжэйшы час”. “Наўрад ці ты зьбярэш хутка хаця бы 1000 подпiсаў”. “Я за. Але ж, на вялікі жаль, у нашай краіне гэта мажліва рабіць толькі на аматарскім узроўні”. “Я за! Я лічу, што гэта адзін з самых дзейсных сродкаў падняць узровень валоданьня беларусамі беларускай мовай! І зрабіць стаўленьне да яе больш станоўчым. І дамагчыся гэтага, па-мойму, ня так ужо нерэальна. Тут няма нічога зьвязанага з палітыкай, і калі яе сюды не мяшаць, дык рэальна адстаяць… Карацей, я за тое, каб зьбіраць подпісы і праводзіць агітацыю ў гэтым кірунку”.

А ў ЖЖ-суполку minsk_by завітаў нехта Sukin_sin_yakin. “Шукаю студэнтаў-менчукоў, якія нядаўна езьдзілі на стажыроўку за мяжу па лініі студэнцкага абмену… інфармацыя патрэбная для падрыхтоўкі тэлесюжэту на адпаведную тэму, – піша ён. – Апроч афіцыйнай інфармацыі цікавіць досьвед людзей… напрыклад, якія бываюць падводныя камяні, хітрыкі, праблемы, нюансы…” Камэнтары ўдзельнікаў суполкі: “Сюжэт пра гандаль беларускімі грамадзянямі за мяжой?” “Я вучылася ў БДУ і па той самай спэцыяльнасьці ў Празе ў Карлавым унівэрсітэце. Наш БДУ нічога ня варты – і па тэхнічных магчымасьцях, і па абсталяваньні памяшканьняў, і па схеме выкладаньня… і па практычнасьці”.

А на сайце Гарадзенскі блог сёньня нехта з удзельнікаў перадрукаваў такую навіну: беларускім сьвінкам у Шчучыне прывесьлі жаніхоў – 98 дацкіх кныроў. Кожны з гэтых прыгажуноў каштуе 2 тысячы даляраў. “У надыходзячым годзьдзе Сьвіньні дырэктару станцыі яўна будзе пару плюсікаў у кармане”, – рэзюмуе аўтар навіны.

Дасылайце свае ідэі ды лінкі для “Начной аБЛОГі”, а таксама любыя іншыя прапановы, тэксты і гукі на электронны адрас NSvaboda@tut.by. Таксама тэлефануйце на менскі аўтаадказьнік 266-39-52 і дасылайце СМС-паведамленьні на нумар 391-22-24.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG