Лінкі ўнівэрсальнага доступу

“Rzeczpospolita” – пра "сакрэтныя пляны Польшчы"


Аляксей Дзікавіцкі, Варшава Аўтарытэтны польскі штодзёньнік “Rzeczpospolita” паінфармаваў, што польскія ўлады разглядаюць магчымасьць афіцыйнага непрызнаньня Аляксандра Лукашэнкі прэзыдэнтам і спыненьня ўсялякіх кантактаў зьБеларусьсю, калі беларускія ўлады пойдуць на крывавы разгон магчымых маніфэстацыяў пратэсту ў дзень галасаваньня і першыя дні пасьля выбараў. Пра тое, наколькі такі крок Варшавы можа быць рэальны, расказвае наш варшаўскі карэспандэнт.

“Rzeczpospolita” піша, што ў сакрэтным пляне рэакцыі на падзеі ў Беларусі, падрыхтаваным МЗС Польшчы, прадугледжваецца магчымасьць афіцыйнага непрызнаньня Аляксандра Лукашэнкі ў выпадку, калі беларускія ўлады выкарыстаюць новае заканадаўства, якое дазваляе ўжываць агнястрэльную зброю, сярод іншага, супраць дэманстрантаў.

Калі гэта сапраўды здарыцца, дык, паводле газэты, у Менск не паедзе новы пасол Польшчы, а сама амбасада можа быць зачыненая, будуць спыненыя ўсе афіцыйныя кантакты нават на нізкім узроўні, уезд на польскую тэрыторыю асобам, якія бралі ўдзел у фальсыфікацыіях будзе забаронены, магчымыя таксама эканамічныя санкцыі.

У Міністэрстве замежных справаў Польшчы на пытаньне, ці такі сцэнар сапраўды магчымы, нашаму радыё адказалі даволі дыпляматычна.

(Дабравольскі: ) “Трэба разглядаць розныя магчымасьці, але непасрэдна такога пляну няма”, – заявіў кіраўнік дэпартамэнту сыстэмаў інфармацыі МЗС Павал Дабравольскі.

Між тым былы намесьнік амбасадара Польшчы ў Беларусі Марак Буцька кажа, што спыненьне дачыненьняў “з рэжымам Лукашэнкі” было б правільным крокам.

(Буцька: ) “На маю думку, улада Аляксандра Лукашэнкі ўжо даўно незаконная. Ён не прэзыдэнт, а ўзурпатар, які хоча сілай утрымацца пры ўладзе. Сапраўдных выбараў ня будзе і гэтым разам – Лукашэнка перасьледуе сваіх канкурэнтаў, а выбары гэта ня толькі дзень галасаваньня. Ранейшая палітыка прэзыдэнта Квасьнеўскага, кіраўнікоў нашага МЗС у дачыненьні да Менску абсалютна не спраўдзілася.

Мець дыпляматычныя дачыненьні з рэжымам мела б сэнс, калі б на яго можна было б паўплываць дыпляматычнымі сродкамі ў справе, прыкладам, павагі да првоў чалавека, ці справе СПБ. Але ж гэта немагчыма. Таму я спадзяюся, што нашыя ўлады рыхтуюцца належным чынам на выпадак, калі Лукашэнка чарговы раз незаконнымі мэтадамі ўтрымаецца ва ўладзе”.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG