Лінкі ўнівэрсальнага доступу

Грамадзкі рэдактар тыдня – настаўніца зь Віцебску Тацяна Севярынец


Аляксандар Уліцёнак, Менск Ад нядзелі па суботу новым грамадзкім рэдактарам Радыё Свабода будзе Тацяна Севярынец. Паўгоду таму за нібыта недазволеную камандзіроўку настаўніцу звольнілі са школы. Супраць звальненьня змагаліся вучні, іхныя бацькі, грамадзкасьць Віцебску. Не атрымала Тацяна Севярынец падтрымкі толькі ад калегаў, зь якімі адпрацавала амаль два дзясяткі гадоў. Чаму школьныя пэдагогі пазьбягаюць абвастрэньня з уладамі? Ці здольныя яны да грамадзянскіх учынкаў? Што галоўнае ў настаўніцкай працы?

Уліцёнак: “Скажыце, калі ласка, Тацяна, чым закончылася гісторыя вашага звальненьня са школы?”

Севярынец: “Яна доўжыцца. Пасьля безвыніковых зваротаў у першыя інстанцыі цяпер зьвяртаемся ў мясцовую пракуратуру, а далей – у Менск”.

Уліцёнак: “А што калегі: спачуваюць, дапамагаюць?”

Севярынец: “Настаўніца, якая замяніла мяне ў ролі кляснага кіраўніка, на бацькоўскім сходзе казала: ёй вельмі балюча і горка за гэта, аднак, маўляў, што зробіш – не сама папрасілася, прымусілі…”

Уліцёнак: “Тое “раскаяньне” для вас бальзам?”

Севярынец: “Мне падаецца, што глядзець на людзей са зламаным сумленьнем яшчэ страшней, чым на пабітых”.

Уліцёнак: “Чаму павінен вучыць настаўнік?”

Севярынец: “Перш за ўсё – мысьленьню. Аднак як ён можа навучыць дзяцей гэтаму, калі ўласныя ўчынкі пэдагога не стасуюцца з тым, што прадэкляравана вучням?”

Уліцёнак: “Ці згодныя вы, што ўлада бясконца ўдзячная настаўнікам за сваё палітычнае доўгажыхарства?”

Севярынец: “На жаль, яны – самыя паслухмяныя ўладзе людзі”.

Уліцёнак: “А маладзейшыя чымсьці адрозьніваюцца ад пэдагогаў са стажам?”

Севярынец: “Самастойнасьць мысьленьня ў пляне грамадзянскасьці я сустракала вельмі рэдка. Калі маладыя калегі чапляюцца за працу, іх пачынае вабіць кар’ера. І каб дайсьці да вызначанай мэты, застаецца вучыцца прыстасаванству”.

Уліцёнак: “А ці здольныя памяняцца вашыя знаёмцы, калі гісторыя зробіць віток і вернецца, умоўна кажучы, да варункаў пачатку 1990-х?”

Севярынец: “Чалавек наагул – істота гібкая. Мяркую, яны ўздыхнуць з палёгкай і стануць рабіць так, як кажуць новыя начальнікі”.

Уліцёнак: “…і “бітва пад Воршай” будзе імі выйграна?”

Севярынец: “Думаю – так…”
XS
SM
MD
LG