А.Лукашэнка і А.Мілінкевіч далі інтэрвію газэце “Le Monde”

Інтэрвію Лукашэнка даў напярэдадні чарговай гадавіны – 11 ліпеня 1996 году адбыўся афіцыйны візыт кіраўніка Беларусі ў Францыю. Фактычна гэта быў першы і апошні ягоны афіцыйны візыт у Эўразьвяз і ўвогуле на Захад.

У інтэрвію францускай газэце Лукашэнка заявіў, што будзе вітаць сур’ёзны дыялёг з новым кіраўніцтвам Францыі, як гэта было прыкладна 8-10 гадоў таму.

Паводле Лукашэнкі, Беларусь і Францыя маглі б разьвіваць супрацоўніцтва ў сфэры энэргетычнай бясьпекі. Гэтае ж пытаньне кіраўнік Беларусі паставіў у якасьці галоўнага ў стасунках Беларусі з Эўразьвязам:

“Гэтай праблемай эўрапейцы даўно павінны былі заняцца, не чакаючы гэтага крызысу ў стасунках паміж Беларусьсю і Расеяй, які балюча ўдарыў па Эўразьвязе. Я вельмі спадзяюся, што новы прэзыдэнт, новае кіраўніцтва Францыі, энэргічнае, маладое, амбітнае ў найбліжэйшай будучыні ўбачаць гэтыя праблемы, і тады яны ацэняць Беларусь”.

Аляксандар Лукашэнка заявіў, што “гэтыя праблемы ўдараць па тых палітыках, якія ў Эўразьвязе сёньня іх не заўважаюць”. Пытаньні свабоды мэдыяў і іншыя ён назваў “эфэмэрнымі”.

Інтэрвію працягвалася каля дзьвюх гадзінаў. Аляксандар Лукашэнка адказаў амаль на 40 пытаньняў. Адносна пашырэньня НАТО і разьмяшчэньня амэрыканскіх проціракет ён заявіў, што гэта пытаньне бясьпекі эўрапейцаў, а не Беларусі.

Напярэдадні інтэрвію газэце “Le Monde” даў былы кандыдат ад аб’яднаных дэмсілаў на пасаду прэзыдэнта Аляксандар Мілінкевіч. Нагадаем, што яго першы замежны візыт у якасьці адзінага кандыдата ў студзені 2006 году быў у Францыю. Спадар Мілінкевіч меў сустрэчы зь Нікаля Сарказі, тагачасным міністрам унутраных справаў, якія цяпер ёсьць прэзыдэнтам Францыі:

“Гэта таленавіты палітык, які выдатна валодае аўдыторыяй. І што яшчэ важна, гэта палітык, які вызнае маральную палітыку. І гэта вельмі важна. Не кан’юнктурную, не прагматычную, а перш за ўсё маральную”.

Адносна пэрспэктываў у стасунках паміж Беларусьсю і Францыяй Аляксандар Мілінкевіч заявіў:

“Я думаю, што ў ЭЗ ёсьць цьвёрда кансалідаваная пазыцыя, і ўсе прытрымліваюцца тых 12-ці ўмоваў, якія былі агучаныя Эўракамісіяй. І калі сёньняшняе кіраўніцтва Беларусі сапраўды жадае супрацоўнічаць з Эўропай, трэба шчыра пачынаць выконваць гэтыя ўмовы. Гэта ўмовы для ўсіх тых, з кім супрацоўнічае ЭЗ. Ён аб’яднаўся на такіх падставах дэмакратыі, свабоды асобы і хацеў бы, каб гэтыя прынцыпы захоўваліся ў іншых краінах. Я ня думаю, што Францыя, тым болей зь сёньняшнім кіраўніком Нікаля Сарказі, будзе праводзіць нейкую асобную палітыку адносна Беларусі”.

Адказваючы на пытаньне, ці можа чарговае інтэрвію Лукашэнкі заходняму выданьню быць знакам нейкіх пераменаў, спадар Мілінкевіч заўважыў:

“Я вельмі шчыра жадаў бы сёньняшняму кіраўніцтву Беларусі ўсё ж пайсьці шляхам дэмакратычных рэформаў”.