Лідэр “Маладога фронту” Зьміцер Дашкевіч адбыў палову тэрміну і, паводле закону, атрымаў права на ўмоўна-дэтарміновае вызваленьне. Нагадаю, Дашкевіч быў пакараны на паўтара году зьняволеньня за удзел ў незарэгістраванай арганізацыі. Ці ёсьць шанцы, што актывіста выпусьцяць на волю датэрмінова? Гэтае пытаньне я задаў Паўлу Севярынцу, які падтрымалівае перапіску са Зьмітром Дашкевічам. Павал сам толькі месяц як вярнуўся з “хіміі”.“Ёсьць такая верагоднасьць. Мы на гэта спадзяемся. Усё ж такі пытаньне пра прэфэрэнцыі вельмі важнае для рэжыму і, напрыклад, вызваленьне Дашкевіча было б расцэненае як вельмі сур’ёзны крок. Зь іншага боку, ўлады вельмі баяцца “Маладога фронту”. Ужо год ідзе надзвычайны перасьлед, але зламаць ня могуць, і ў такой сытуацыі выпусьціць Дашкевіча на волю для рэжыму боязна. Вось паміж гэтымі акалічнасьцямі ўся драматургія і разгортваецца: вызваляць – ня вызваляць”.
Павал Севярынец перакананы: калі будзе загад зьверху, ня будуць перашкодай і спагнаньні, накладзеныя на Дашкевіча ў калёніі.
А.Фінькевіч: “БТ хацела паказаць, што ў краіне нібыта няма палітвязьняў”
Свайго калегу Дашкевіча павіншаваў з “мэдыюмам” турэмнага тэрміну “хімік” Артур Фінькевіч. З Магілёву хлопец адправіў у Шклоўскую калёнію паштоўку. Самому Артуру знаходзіцца на “хіміі” яшчэ да сьнежня. На мінулыя выходныя актывіста ізалявалі ў камэндатуры . Некаторыя не выключалі, што ў сувязі з магчымым датэрміновым вызваленьнем. Але верагодна, ўлады баяліся, што з палітвязьнем сустрэнецца супрацоўнік амбасады ЗША у Беларусі. Паводле зьвестак, замежны дыплямат зьбіраўся зьезьдзіць у Магілёўскую вобласьць і мог завітаць да Фінькевіча – прынамсі, такая вэрсія самога Артура.У мінулую нядзелю Артур Фінькевіч аказаўся ў цэнтры яшчэ адной падзеі – яго паказалі па беларускай тэлевізіі. Праўда, як кажа актывіст, пры гэтым зрабілі шэраг памылак: назвалі яго лідэрам “Маладога фронту”, сказалі, што ён адбывае пакараньне ў калёніі, хаця ён знаходзіцца на “хіміі” і нават паказалі калючы дрот, за якім вязень нібыта ходзіць нападпітку. Артур Фінькевіч пракамэнтаваў сюжэт гэтак:
“Сюжэт быў зроблены дзеля таго, каб зрабіць зь мяне не палітзьняволенага, а звычайнага хулігана. Паказаць, што ў краіне нібыта няма палітвязьняў. Тое, што ў сюжэце зь белага робяць чорнае звычайна для беларускага тэлебачаньня. У такіх сюжэтах сапраўднай журналістыкі няма”.
Клімаў у мэдычным ізалятары, Казулін у трэці раз пакараны за парушэньне дысцыпліны
Андрэй Клімаў на гэтым тыдні вярнуўся з рэспубліканскага турэмнага шпіталя ў менскі сьледчы ізалятар. Вязень напісаў сваякам, што пакуль яго паклалі ў мэдычны стацыянар ізалятару. Пра тое, як праходзіць лячэньне, Клімаў не паведамляе, але задаволены ужо тым, што ў палаце ніхто ня паліць. Нагадаю, раней Андрэй Клімаў скардзіўся на недахоп сьвежага паветра, бо ў камэры ўсе палілі. Між тым дактары прызналі ў былога дэпутата стэнакардыю. Пад арыштам Клімаў ужо болей за два месяцы.
Аляксандр Казулін трэці раз пакараны за парушэньне дысцыпліны. Гэта зьвесткі ад адміністрацыі калёніі “Віцьба-3”, дзе адбывае пакараньне былы кандыдат на прэзыдэнта. Што дакладна зрабіў Казулін – невядома. Фармальна трэцяе спагнаньне ўплывае на шанцы вязьня на ўмоўна-датэрміновае вызваленьне альбо амністыю. Нагадаю, з 5,5 гадоў Аляксандр Казулін адбыў толькі 14 месяцаў.
Зьмітра Дашкевіча наведаў адвакат 09.06.2007 У спэцкамэндатуры не выключаюць хуткага вызваленьня А.Фінькевіча 08.06.2007 Ці выйдуць на волю ўсе палітвязьні? 30.05.2007