Лінкі ўнівэрсальнага доступу

Пінск: арыштаваны старшыня гарадзкой арганізацыі БНФ


Радыё Свабода Сёньня ў Пінску меўся адбыцца суд у справе старшыні гарадзкой арганізацыі Партыі БНФ Аляксандра Рамановіча. Учора вечарам яго спынілі на вуліцы міліцыянты й прымусова даставілі ў пастарунак. Сёньня ў Берасьці, Баранавічах, Бярозе, Белаазёрску ды ў іншых гарадах вобласьці КДБ і міліцыя працягвалі выклікаць на гутаркі сяброў апазыцыйных партыяў і рухаў.

За некалькі хвілінаў да эфіру Радыё Свабода мы падтрымлівалі сувязь з прысутнымі ля будынку Пінскага гарсуду. Тут былі сябры Аляксандра, ягоны бацька й сьведкі.

Паведамляе Канстанцін Чувак:

“Вось вязуць, мабыць. Едзе аўтамашына. Заяжджае ў двор. Пакуль мы ня ведаем — ён ці не. Зараз, мажліва, пабачым, калі будзе зручна. Пакуль стаіць аўтамашына. Вось выходзяць міліцыянты. Адчыняюць дзьверы. У нашым кірунку паказваюць пальцамі. Хутчэй за ўсё, што нас адсюль будуць гнаць...”

Учора ў інтэрвію Радыё Свабода Аляксандар Рамановіч паведаміў, што ўчастковы спрабаваў уручыць яму позву ў міліцыю — нібыта для гутаркі. Юнак катэгарычна адмовіўся ад такой прапановы.

Але, як сёньня кажа бацька Мікалай Якаўлевіч, супрацоўнікі КДБ і міліцыі падпільнавалі яго на вуліцы:

“Гэта была сплянаваная апэрацыя. На вуліцы імя Ўрыцкага стаяла аўтамашына з двума супрацоўнікамі. Сьведку, які быў з Аляксандрам, адпусьцілі. А раніцай паднялі яго з ложка, забралі ў аддзел міліцыі. Для так званай апрацоўкі”.

Бацька Аляксандра кажа, што сьведка затрыманьня ягонага сына прыйшоў у суд. Са словаў старэйшага Рамановіча, гэта вымушае міліцыянтаў пераглядаць пратакол затрыманьня й пераносіць пачатак суду.

Тым часам, як паведамляе жыхар Пінску й сябра Партыі БНФ Аляксандар Аўсеенка, у Пінску працягваюць перасьлед апазыцыянэраў:

“Дзяжурылі каля майго дому. Нумар аўтамашыны 10-70 АС1, у якой знаходзіліся два міліцыянты. Пільнавалі, каб мяне ўзяць. Аднак не дачакаліся. Да Канстанціна Чувака міліцыянты ламіліся ў дзьверы. Да Аляхновіча заходзілі двойчы. Ідзе паляваньне на актывістаў. Працуюць паводле сьпісаў. Арыштаваць, ілжывыя зьвесткі даць і пасадзіць. Гэта зрабілі ўжо з Рамановічам”.

Далей гаворыць кіраўнік Берасьцейскай абласной арганізацыі Партыі БНФ Юрась Губарэвіч, якога сёньня выклікала міліцэйскае начальства:

“Гэта Валеры Ўгляніца — начальнік РАУС Бярозаўскага раёну. Прысутнічаў на сустрэчы і ягоны намесьнік. Была спроба паінфармаваць мяне і папярэдзіць пра наяўнасьць у Крымінальным і Адміністрацыйным кодэксах артыкулаў, якія прадугледжваюць адказнасьць за ўдзел у масавых мерапрыемствах.

Паводле нашых зьвестак, на сёньняшні дзень пералік такіх “запрашэньняў” ідзе на дзясяткі. Паводле маіх падлікаў, ня менш за пяцьдзясят чалавек атрымалі такія позвы”, — гаварыў Юрась Губарэвіч.

Пра тое, як разгортваюцца падзеі, слухайце пазьней у нашым эфіры.

***

18:25. Толькі што стала вядома, што суд над Аляксандрам Рамановічам адкладзены да заўтра. Паводле афіцыйнага тлумачэньня, прычынай сталася адсутнасьць ягонага адваката.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG