Фільмам году стаў «Пад шэрым небам». Стужка заснаваная на рэальных падзеях. Яна апавядае гісторыю журналісткі «Белсату» Кацярыны Андрэевай і яе мужа Ігара Ільяша. Яны застаюцца палітычнымі зьняволенымі ў Беларусі. Фільм пра іх не дакумэнтальны, але грунтуецца на сапраўднай гісторыі, у тым ліку на размовах рэжысэркі з Ільяшом і з затрыманай разам з Кацярынаю журналісткай Дар’яй Чульцовай.
Усяго ў разглядзе кінапрэміі бралі ўдзел 60 стужак: гэта поўна- і кароткамэтражныя гульнявыя, дакумэнтальныя і анімацыйныя стужкі, якія былі створаныя беларусамі. Асобна гэтым разам разглядаліся дакумэнтальныя рэпартажы. Дзьве з намінацыяў — «Найлепшы дакумэнтальны рэпартаж» і «Найлепшы мантаж» — зьявіліся ў гэтым сэзоне кінапрэміі ўпершыню. Некаторыя фільмы бяруць удзел у конкурсе на ўмовах ананімнасьці аўтараў.
У шорт-ліст кінапрэміі трапілі 45 твораў.
Сьпіс пераможцаў кінапрэміі «Чырвоны верас»
- Найлепшы гульнявы поўнамэтражны фільм — «Пад шэрым небам» Мары Тамковіч.
- Найлепшы гульнявы кароткамэтражны фільм — «Say Cheese» Кіры Альшэўскага.
- Найлепшы поўнамэтражны дакумэнтальны фільм — «Радзіма» Ганны Бадзякі і Аляксандра Міхалковіча.
- Найлепшы кароткамэтражны дакумэнтальны фільм — «Сьвятая вада» Андрэя Куцілы.
- Найлепшы анімацыйны фільм — «Кроў і караоке» Юрыя Сямашкі.
- Найлепшы дакумэнтальны рэпартаж (дакумэнтальны фільм тэле- і YouTube-фармату) — «Бяз рэтушы: Сяргей Пукст» Аляксандра Гарадка і Канаплёва-Лейдзік.
- Найлепшы(ая) рэжысэр(ка) — Ганна Бадзяка і Аляксандар Міхалковіч за фільм «Радзіма».
- Найлепшы актор — Валянцін Навапольскі за ролю ў фільме «Пад шэрым небам».
- Найлепшая акторка — Аляксандра Вайцяховіч за ролю ў фільме «Пад шэрым небам».
- Найлепшая праца апэратара — Сяргей Канаплянік за фільм «Радзіма».
- Найлепшы сцэнар — Андрэй Кашперскі і Міхаіл Зуй за фільм «Працэсы».
- Найлепшае мастацкае рашэньне (праца мастака-пастаноўшчыка) — Аляксандар Адамаў за фільм «Працэсы».
- Найлепшы мантаж — Iльля Бажко за фільм «Працэсы».
- Найлепшы гукавы дызайн (праца кампазытара(кі) ці гукарэжысэра(кі)) — праект «Крос-культурны музычны дыялёг» за фільм «Чароўныя нажнічкі»
- Адкрыцьцё году — ананімны ўдзельнік.
- «Спэцыяльная згадка» — стваральнікам фільму «Чароўныя нажнічкі». «За руплівую працу — збор, захаваньне і ўзнаўленьне страчанай часткі нашай спадчыны — культуры беларускага габрэйства, і празь іх — за дапаўненьне і ўзбагачэньне беларускасьці».
- «Спэцыяльная згадка» — беларускім палітвязьням. «У гонар шматлікіх палітзьняволеных і іхных трагічных лёсаў, якія не дазваляюць рэжысэрам маўчаць і прымушаюць апавядаць сьвету пра беларускую сучаснасьць і траўматычнае мінулае».
Беларуская прэмія «Чырвоны верас» адзначае найлепшыя дасягненьні ў сфэры незалежнага беларускага кіно з 2022 году. Тады лепшым поўнамэтражным мастацкім фільмам была прызнаная стужка «II» («Два») Ульяны Сяньковай, а сярод кароткамэтражных мастацкіх фільмаў — «Возера радасьці» Аляксея Палуяна. Наступным разам, у 2024 годзе лепшым гульнявым поўнамэтражным фільмам журы «Чырвонага вераса» прызнала стужку Мікіты Лаўрэцкага «Спатканьне ў Менску», а сярод кароткамэтражных фільмаў — «Сьмецьцевая галава» Юрыя Сямашкі.
Сузаснавальнікамі кінапрэміі «Чырвоны верас» зьяўляюцца кінакрытыкі Ірэна Кацяловіч і Тарас Тарналіцкі.
У журы прэміі ўвайшлі 20 чалавек: гэта дасьледніцы кіно Альміра Усманава, Саша Разор і Вольга Ісакава, кінааналітык Максім Жбанкоў, фэстывальны арганізатар Ігар Сукманаў, кінакрытыкі Ганна Яфрэменка і Ульяна Рубанава, кінажурналістка Натальля Бабілёнская і сузаснавальнікі прэміі — кінакрытыкі Тарас Тарналіцкі і Ірэна Кацяловіч. Некаторыя экспэрты ананімныя.
Прэмію «Чырвоны верас» заснавалі чацьвёра энтузіястаў-кінакрытыкаў у 2021 годзе, калі стала канчаткова зразумела, што беларускае незалежнае кіно існуе ў новай рэчаіснасьці: «неляяльнае» кіно станавілася немагчымым унутры Беларусі.
Форум