Як паведаміла Генэральная пракуратура Грузіі, Гарыбашвілі заключыў угоду са сьледзтвам.
Апроч пазбаўленьня волі, яму прызначылі штраф у памеры аднаго мільёна лары (каля 370 тысяч даляраў). На карысьць дзяржавы таксама будзе канфіскаваная сума, «атрыманая ў выніку злачыннай дзейнасьці і канфіскаваная падчас ператрусу яго жылога дома», — шэсьць з паловай мільёнаў даляраў.
«Рэха Каўказу» са спасылкай на адваката піша, што былы прэмʼер Грузіі ўжо адпраўлены пад варту.
Паводле сьледчых, Гарыбашвілі, які займаў пасады міністра абароны і прэмʼер-міністра ў 2019-2024 гадах, як дзяржаўная службовая асоба, паводле закону «Аб барацьбе з карупцыяй» ня меў права ўдзельнічаць у прадпрымальніцкай дзейнасьці і атрымліваць даходы, акрамя зарплаты. Нягледзячы на гэта, Гарыбашвілі таемна займаўся бізнэсам і атрымліваў незаконныя прыбыткі.
Як сьцьвярджаецца, у дэклярацыях ён указваў ілжывыя зьвесткі, быццам штогод атрымліваў буйныя грашовыя падарункі ад члена сямʼі. Такім чынам ён спрабаваў узаконіць частку прыбыткаў — у памеры каля 300 тысяч даляраў, атрыманых ад удзелу ў прыватным бізнэсе.
Менавіта падчас прэмʼерства Гарыбашвілі Аляксандар Лукашэнка у красавіку 2015 году зрабіў першы афіцыйны візыт у Грузію.
Форум