У 2024 годзе ў выніку баявых дзеяньняў, перш за ўсё ўдараў па грамадзянскай інфраструктуры, на тэрыторыі Ўкраіны і Расеі загінулі сама меней 2600 цывільных, больш за 14 тысяч чалавек былі паранены. Такія зьвесткі ўтрымліваюцца ў дакладзе «Ахвяры сярод мірнага насельніцтва ад абстрэлаў у 2024 годзе», падрыхтаваным расьсьледніцкай групай Conflict Intelligence Team (CIT).
Падлікі заснаваныя на зводках пра абстрэлы грамадзянскай інфраструктуры, якія зьбіраюць валянтэры групы і ў якіх штодня фіксуецца інфармацыя пра ахвяраў і пацярпелых сярод мірнага насельніцтва. У зводкі ўваходзяць ахвяры ракетных і бомбавых удараў, абстрэлаў з рэактыўнай і ствольнай артылерыі, а таксама нападаў бесьпілётнікаў і падрываў на мінах.
CIT падкрэсьлівае, што пры зборы інфармацыі арыентуецца ў першую чаргу на заявы афіцыйных асобаў і на пацьверджаныя адкрытыя дадзеныя. Акрамя таго, дасьледчыкі не ўлічвалі ўдары, відавочна нанесеныя па ваенных аб’ектах, нават калі ў іх выніку гінулі цывільныя.
Паводле падлікаў CIT:
- 1915 мірных жыхароў, сярод якіх 81 дзіця, загінулі ў выніку абстрэлаў на падкантрольнай уладам Украіны тэрыторыі краіны.
- 452 чалавекі, сярод якіх 20 дзяцей, загінулі на тэрыторыі Ўкраіны, падкантрольнай Расеі.
- 233 чалавекі загінулі ад абстрэлаў на тэрыторыі Расеі, сярод іх 14 дзяцей.
Раненьні і траўмы на расейскай тэрыторыі за 2024 год атрымалі больш за 1600 чалавек, на тэрыторыі Ўкраіны — больш за 12 500 (у тым ліку больш за 2300 — на акупаваных Расеяй тэрыторыях).
Паколькі валянтэры пачалі зьбіраць інфармацыю толькі ў канцы 2023 году, параўнаць гэтыя лічбы з больш раньнімі зьвесткамі немагчыма. Паводле зьвестак ААН, агулам з пачатку расейскага шырокамаштабнага ўварваньня ва Ўкраіну загінулі больш за 12 тысяч мірных жыхароў — гэтыя зьвесткі няпоўныя, адзначаюць у ААН.
Найбольш сьмяротным, гаворыцца ў паведамленьні CIT, стаў масіраваны ракетны ўдар па Кіеве раніцай 8 ліпеня, калі ў тым ліку пацярпела дзіцячая бальніца «Ахматдзет». Тады загінулі 34 чалавекі, яшчэ 121 чалавек атрымаў раненьні.
На тэрыторыі Расеі загінулыя і пацярпелыя ў 2024 годзе ў выніку ўкраінскіх удараў былі ў 16 рэгіёнах. Пераважная большасьць загінулых і параненых — жыхары Белгарадзкай вобласьці.
Ва Ўкраіне больш за ўсё загінулых у Данецкай, Харкаўскай і Херсонскай абласьцях, у якіх вядуцца актыўныя баявыя дзеяньні. Асабліва ў Херсонскай вобласьці: там, як сьцьвярджаецца ў дакладзе CIT, расейскія вайскоўцы ўжываюць дроны пры ўдарах па мірных жыхарах і «ўладкоўваюць паляваньне на безабароннае мірнае насельніцтва».
Як канстатуе CIT, у цэлым «за безразборным ужываньнем сілы, хоць і ў розных маштабах, прыкмечаныя абодва бакі». Абодва бакі пры гэтым заяўляюць, што наносяць удары толькі па ваенных або інфраструктурных абʼектах. У выпадках, калі відавочна вялікая колькасьць ахвяраў сярод мірных жыхароў, расейскія афіцыйныя прадстаўнікі, як правіла, сьцьвярджаюць, што гэта вынік працы ўкраінскай сыстэмы СПА.
Форум