Абмежаваньне або забарона на наведваньне лясоў дзейнічаюць у 63 з 118 раёнаў Беларусі, сьведчыць інтэрактыўная карта на сайце Міністэрства лясной гаспадаркі, піша «Позірк».
У 13 раёнах цалкам забаронена наведваць лес: у Берасьцейскай вобласьці — у Кобрыньскім, Жабінкаўскім, Берасьцейскім, Пружанскім, Янаўскім, Камянецкім, Маларыцкім і Пінскім; у Горадзенскай — у Воранаўскім, Лідзкім, Шчучынскім і Мастоўскім; у Менскай — у Стаўпецкім.
Абмежаваньні дзейнічаюць у:
- Баранавіцкім, Бярозаўскім, Ганцавіцкім, Драгічынскім, Івацэвіцкім, Лунінецкім, Ляхавіцкім, Столінскім раёнах Берасьцейскай вобласьці;
- Докшыцкім і Лепельскім раёнах Віцебскай вобласьці;
- Брагінскім, Буда-Кашалёўскім, Веткаўскім, Гомельскім, Добрускім, Ельскім, Жыткавіцкім, Калінкавіцкім, Лельчыцкім, Лоеўскім, Мазырскім, Нараўлянскім, Акцябрскім, Петрыкаўскім, Рэчыцкім, Сьветлагорскім, Хойніцкім раёнах Гомельскай вобласьці;
- Бераставіцкім, Ваўкавыскім, Горадзенскім, Дзятлаўскім, Зэльвенскім, Іўеўскім, Карэліцкім, Наваградзкім, Астравецкім, Ашмянскім, Сьвіслацкім, Слонімскім, Смаргонскім раёнах Горадзенскай вобласьці;
- Бярэзінскім, Барысаўскім, Валожынскім, Дзяржынскім, Любанскім, Менскім, Мядзельскім, Смалявіцкім і Салігорскім раёнах Менскай вобласьці;
- Магілёўскім раёне.
Увядзеньне адпаведных абмежаваньняў ляжыць на адказнасьці райвыканкамаў. У кожным раёне прымяняюцца свае меры абмежавальнага характару (час наведваньня, уезд на транспарце, асобныя ўчасткі ляснога фонду).
Пры абмежаваньні (жоўты ўзровень) дазваляецца наведваньне лясоў, але не на аўтатранспарце і без разьвядзеньня вогнішчаў. Пры забароне (чырвоны ўзровень) лес наведваць нельга.
Паводле апэратыўных зьвестак МНС, раніцай 12 траўня быў зьліквідаваны лясны пажар на плошчы 0,01 га і 3 пажары травы і кустоў на агульнай плошчы 0,062 га.
Паводле прагнозу сыноптыкаў, на поўдні краіны 12 траўня паветра прагрэецца да 16 градусаў цяпла.
Форум