Лінкі ўнівэрсальнага доступу

Інстытут вывучэньня вайны: Менск узмацняе рыторыку Крамля аб тым, што Ўкраіна пагражае існаваньню Расеі і Беларусі


Беларускія вайскоўцы на вучэньнях паблізу ўкраінскай мяжы. Ілюстрацыйнае фота
Беларускія вайскоўцы на вучэньнях паблізу ўкраінскай мяжы. Ілюстрацыйнае фота

Экспэрты ацанілі гучныя заявы міністра абароны Беларусі Віктара Хрэніна, якія той зрабіў у інтэрвію расейскай тэлевізіі.

Экспэрты амэрыканскага Інстытуту вывучэньня вайны канстатавалі далейшае ўмацаваньне вайскова-тэхнічнага супрацоўніцтва Беларусі і Расеі. Да такой высновы экспэрты прыйшлі пасьля аналізу заяў міністра абароны Беларусі Віктара Хрэніна, якія той зрабіў у інтэрвію расейскай тэлевізіі 22 лютага.

«Беларусь працягвае ўмацоўваць вайскова-тэхнічнае супрацоўніцтва з Расеяй. Міністар абароны Беларусі Віктар Хрэнін заявіў, што Расея і Беларусь стварылі заканадаўчую базу для стварэньня і функцыянаваньня супольных цэнтраў баявой падрыхтоўкі і нядаўна прапанавалі распрацаваць плян супольнай праграмы ўзбраеньня. Хрэнін таксама заявіў, што супольная расейска-беларуская рэгіянальная групоўка войскаў правядзе вучэньні ў 2025 годзе», — адзначылі экспэрты.

Паводле іх, заявы Віктара Хрэніна таксама сьведчаць аб узмацненьні беларускім бокам крамлёўскай рыторыкі аб тым, што Ўкраіна нібыта ўяўляе пагрозу існаваньню Расеі і Беларусі.

Віктар Хрэнін у інтэрвію расейскай тэлевізіі заявіў, што ля мяжы зь Беларусьсю Ўкраіна нібыта сканцэнтравала да 114 тысяч вайскоўцаў «ударнай групоўкі». У цытаце, якую апублікавала дзяржаўнае агенцтва БелТА з гэтага інтэрвію, фармуляваньне «ударная групоўка» адсутнічала. Пазьней у апублікаваным на сайце Міністэрства абароны Беларусі тэксьце выказваньне ўдакладнілі: «На сёньня, паводле нашых ацэнак недзе каля 112-114 тысяч чалавек ударная групоўка. Зь іх для непасрэднай аховы ўкраінскай мяжы залучаюць каля 17 тысяч асабовага складу».

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG