Лінкі ўнівэрсальнага доступу

Ціханоўская ўпершыню прыбыла зь візытам у Малдову, перад гэтым яна наведала Аўстрыю, а яе дарадца Вячорка — Аўстралію


Нацыянальны сакратар рабочай партыі Аўстраліі Пол Эрыксан і дарадца Сьвятланы Ціханоўскай Франак Вячорка. Канбэра, 19 кастрычніка 2023
Нацыянальны сакратар рабочай партыі Аўстраліі Пол Эрыксан і дарадца Сьвятланы Ціханоўскай Франак Вячорка. Канбэра, 19 кастрычніка 2023

19 кастрычніка Сьвятлана Ціханоўская выступіла ва ўнівэрсытэце MCI (Цэнтар мэнэджмэнту ў Інсбруку). Тым часам яе галоўны дарадца Франак Вячорка ў Аўстраліі правёў сустрэчы з урадам, парлямэнтарамі, дыпкорпусам.

Пасьля наведваньня Аўстрыі на 20–21 кастрычніка ў графіку Сьвятланы Ціханоўскай візыт у Малдову.

«Я рада пачаць свой візыт у Малдову па запрашэньні прэзыдэнта Маі Санду. Я зь нецярплівасьцю чакаю магчымасьці абмеркаваць нашы агульныя эўрапейскія памкненьні», — напісала Ціханоўская ў сацсетках.

Апрача прэзыдэнткі Маі Санду, Ціханоўская таксама сустрэнецца са сьпікерам парлямэнту Малдовы Ігарам Гросу, парлямэнцкай групай «За дэмакратычную Беларусь», возьме ўдзел у Малдоўскім жаночым форуме.

Як паведаміла прасавая служба Ціханоўскай, у Канбэры дарадца Сьвятланы Ціханоўскай Франак Вячорка сустрэўся з намесьнікам міністра замежных справаў Аўстраліі, прадстаўнікамі Міністэрства ўнутраных справаў, з офісам прэм’ер-міністра, новапрызначаным паслом Аўстраліі ў Расеі (які па сумяшчальніцтве адказвае за Беларусь), амбасадарам у правах чалавека, лідэрамі кіроўнай Рабочай партыі Аўстраліі.

Таксама Вячорка правёў асобныя сустрэчы з кіраўніком дэлегацыі ЭЗ, амбасадарамі Нямеччыны, Францыі, Латвіі, Польшчы, сустрэўся зь беларускай дыяспарай і экспэртнай супольнасьцю.

Як піша прэсавая служба Офіса Сьвятлана Ціханоўскай, падчас сустрэч абмяркоўвалі падтрымку для былых палітвязьняў і іх рэабілітацыю, прыцягненьне рэжыму да адказнасьці праз Міжнародны крымінальны суд, санкцыі супраць лукашэнкаўскіх памагатых і алігархаў, прапагандыстаў і судзьдзяў. Вячорка заклікаў Аўстралію падняць пытаньне Беларусі ў рамках Вялікай дваццаткі (G20) і ASEAN. Таксама абмяркоўвалі магчымы візыт Сьвятланы Ціханоўскай у Аўстралію ў 2024 годзе.

Вячорка заклікаў новапрызначанага амбасадара ў Расею і Беларусь не ўручаць даверчыя лісты Лукашэнку.

На сустрэчы зь Міністэрствам унутраных справаў гаварылі аб праблемах легалізацыі беларусаў у Аўстраліі, выдачы часовых праязных дакумэнтаў, а таксама аб прызнаньні новага беларускага пашпарта.

Раней Аўстралія ўвяла пэрсанальныя санкцыі супраць Аляксандра Лукашэнкі, ягоных дзяцей і блізкіх памагатых, міністра абароны Хрэніна. Аўстралія падтрымала рашэньне аб прымяненьні 33-га артыкулу Статуту Міжнароднай арганізацыі працы супраць рэжыму Лукашэнкі за парушэньне правоў працоўных. Аўстралія не прызнала вынікаў выбараў 2020 году.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG