Асабліва церпяць дачнікі, піша партал «Зеркало» са спасылкай на паведамленьне тэлеканалу СТБ. Як прагучала ў этэры, галоўнае для чалавека — пазьбегнуць прамога кантакту з восамі. Пасьля ўкусу арганізм можа павесьці сябе непрадказальна.
«Праявы гэтай інсэктнай алергіі могуць быць разнастайныя: ад мясцовага пачырваненьня ў месцы ўкусу да цяжкіх сыстэмных рэакцый, ажно да анафіляктычнага шоку. На маёй памяці ёсьць выпадкі сьмяротнага зыходу ад укусу казурак», — сказала загадчыца аддзяленьня алергалёгіі і прафпаталёгіі 10-га гарадзкога клінічнага шпіталя Менску Натальля Дударава.
«Тым пацыентам, якія ўжо сустракаліся з такімі алергічнымі рэакцыямі, мы раім мець пры сабе аптэчку. У яе павінны ўваходзіць прэпараты для аказаньня неадкладнай дапамогі», — дадала яна.
Такая актыўнасьць інсэктаў, якія джаляць, зьвязаная з анамальна гарачым надвор’ем. Перастануць лятаць яны толькі пры тэмпэратуры ніжэй за 10 градусаў цяпла.