У М’янме вайсковая хунта памілавала Нобэлеўскую ляўрэатку Аўн Сан Су Чы. Аднак толькі часткова
Памілаваньне азначае, што з 33-гадовага тэрміну зьняволеньня Аўн Сан Су Чы здымуць 6 гадоў, заявіў інфармацыйны прадстаўнік хунты генэрал Заў Мін Тун у камэнтары Eleven Media Group.
Ляўрэаткаю Нобэлеўскай прэміі міру ў 1991 годзе палітык стала пад хатнім арыштам. На волю яна выйшла толькі ў 2010-м, празь пяць гадоў выйграла выбары, затым яшчэ адны, але на пачатку 2021 году яе з паплечнікамі адхіліла ад улады вайсковая хунта, дзеяньні якой прывялі да баёў у многіх гарадах і тысяч палітычных зьняволеных.
78-гадовая Аўн Сан Су Чы зноў апынулася за кратамі, хоць адкінула ўсе абвінавачаньні ў фальсыфікацыі выбараў, хабарніцтве і іншым.
Ананімны дыплямат у камэнтары Reuters назваў частковае памілаваньне палітыка «касмэтычным крокам» хунты, якая трымае ўладу ў краіне.
