Польскі Цэнтар паветраных апэрацый заўважыў зьяўленьне ў паветранай прасторы краіны абʼекта, які прыляцеў з боку Беларусі, паведаміла 13 траўня Міністэрства нацыянальнай абароны Польшчы.
Паводле інфармацыі Цэнтру паветраных апэрацый, гэта, верагодна, назіральны аэрастат. У ведамстве адзначылі, што каля Рыпіна (горад у паўночнай частцы Польшчы) радыёлякацыйная сувязь з абʼектам была страчана.
«Камандуючы апэратыўным штабам прыняў рашэньне задзейнічаць дзяжурныя сілы тэрытарыяльнай абароны для пошуку абʼекта», — гаворыцца ў паведамленьні Мінабароны Польшчы.
Прадстаўнік камандаваньня тэрытарыяльных войскаў абароны маёр Вітольд Сура распавёў тэлеканалу Polsat, што раніцай у пазначаны раён вывелі наземны пошукава-выратавальны атрад 8-й брыгады Куяўска-Паморскай тэрытарыяльнай абароны.
Беларускі бок пакуль ніяк не камэнтаваў інцыдэнт.
