Пэнсіянэр адмовіўся даваць паказаньні перад судзьдзёй, а пракуратура абгрунтавала неабходнасьць ягонага арышту тым, што падазраваны можа схавацца або зьнішчыць доказы. Справа расьсьледуецца па артыкуле аб тэрарызьме.
Па дадзеных La Sexta, падчас ператрусу ў доме падазраванага знайшлі бесьпілётнік і электронныя прылады, якія маглі быць задзейнічаныя для «скіданьня выбухоўкі». Па папярэдніх дадзеных паліцыі, мужчына дзейнічаў у адзіночку.
Гішпанскія СМІ пісалі, што да выхаду на пэнсію Гансалес працаваў дзяржаўным служачым у гарадзкой радзе Віторыі. Па словах крыніц газэты ABC, гэта «самотны і дзіўны чалавек з прарасейскімі поглядамі».
- У канцы мінулага году пасылкі з выбуховымі прыладамі былі разасланыя па адрасах гішпанскіх дзяржаўных устаноў і шэрагу стратэгічных і ахоўных абʼектаў. «Паштовыя бомбы» былі адрасаваныя, у прыватнасьці, у офіс гішпанскага прэмʼер-міністра Пэдра Санчэса і ў Міністэрства абароны краіны, у амэрыканскую і ўкраінскую дыпмісіі, у спадарожнікавы цэнтар авіябазы ў Тарэхон-дэ-Ардас пад Мадрыдам.
- Большасьць з бомбаў удалося абясшкодзіць — выбухнула толькі пасылка, якая была дасланая на імя амбасадара Ўкраіны Сяргея Пагарэльцава. Падчас яе адкрываньня быў паранены супрацоўнік службы бясьпекі ўкраінскага пасольства.
- Пазьней некалькі дыпляматычных устаноў Украіны за мяжой атрымалі акрываўленыя пакеты, у якіх знаходзіліся вочы забітых жывёлін. Паводле інфармацыі Кіева, такія пасылкі прыйшлі ў пасольствы ў Вугоршчыне, Нідэрляндах, Польшчы, Харватыі, Італіі і Чэхіі.