Лінкі ўнівэрсальнага доступу

Судовае сьледзтва ў «справе Аўтуховіча» скончылася. Неўзабаве — прысуд


Перад судовым працэсам у «справе Аўтуховіча»
Перад судовым працэсам у «справе Аўтуховіча»

У судзе таксама прайшлі спрэчкі, а фігуранты мелі магчымасьць сказаць апошняе слова.

Максім Філатаў, які разглядае справу, сышоў у дарадчы пакой, каб прыняць рашэньне наконт прысуду.

Прысуд абвесьцяць 17 кастрычніка, паведамляе праваабарончы цэнтар «Вясна».

19 верасьня працэс зрабілі закрытым. Адвакаты знаходзяцца пад падпіскай аб нявыдаваньні. Таму інфармацыя, колькі пракурор запрасіў для абвінавачаных, — сакрэтная.

Раней ішла дыскусія, ці можа некаторым фігурантам справы пагражаць сьмяротнае пакараньне. Частка 3 артыкулу 289 («Акт тэрарызму»), якую закідаюць некаторым фігурантам справы, прадугледжвае такое пакараньне.

Толькі двое з абвінавачаных «справы Аўтуховіча» цалкам прызналі сваю віну. Некаторыя зьняволеныя заявілі, што іх зьбівалі і катавалі пасьля затрыманьня, а таксама пра жудасныя ўмовы ў СІЗА, у якіх іх трымаюць дагэтуль.

Некалькі фігурантаў неаднаразова каралі «соднямі» у карцары. Уладзімер Гундар і Мікола Аўтуховіч трымалі галадоўку па некалькі тыдняў. Судовы працэс доўжыўся больш за чатыры месяцы.

Галоўнае пра «справу Аўтуховіча»

Пра затрыманьне «групы Аўтуховіча» дзяржаўныя СМІ расказалі ўвечары 8 сьнежня 2020 году. Паводле іх, за падпаламі дома міліцыянта ў Ваўкавыску і падрывам аўтамабіля супрацоўніка міліцыі ў Горадні стаіць групоўка, якой кіраваў ваўкавыскі прадпрымальнік і былы палітвязень Мікалай Аўтуховіч.

Спачатку Сьледчы камітэт распачаў крымінальную справу паводле ч. 2 арт. 218 КК «Наўмыснае пашкоджаньне маёмасьці, учыненае агульнанебясьпечным спосабам». Потым Генпракуратура перакваліфікавала яго на ч. 1 арт. 289 — «Акт тэрарызму», які прадугледжвае пазбаўленьне волі да 15 гадоў. Некаторым з абвінавачаных інкрымінавалі частку 3 гэтага ж артыкулу, паводле якой пагражала сьмяротнае пакараньне.

Частка 3 артыкулу 289 прадугледзваецца, калі акты тэрарызму «учыненыя арганізаванай групай, або з прымяненьнем аб’ектаў выкарыстаньня атамнай энэргіі, або з выкарыстаньнем радыяактыўных рэчываў або ядзерных матэрыялаў, моцнадзейных, таксычных хімічных або біялягічных рэчываў або спалучаныя з забойствам чалавека».

Разгляд «справы Аўтуховіча» цягнуўся 5 месяцаў. Працэс праходзіў у горадзенскай турме.

Падчас працэсу падсудныя неаднаразова заяўлялі пра ціск і катаваньні з боку сілавікоў і адміністрацыі турмы. Сярод іншага фігуранты заяўлялі, што справа супраць іх сфабрыкаваная.

Працэс вёў судзьдзя Максім Філатаў, які знаходзіцца пад санкцыямі Эўразьвязу. Ён вядомы тым, што асудзіў на 5 год зьняволеньня актывіста зь Бярозаўкі Вітольда Ашурка, які пазьней пры нявысьветленых абставінах загінуў у шклоўскай калёніі.

17 кастрычніка 2022 году Філатаў вынес выракі:

  • Мікалаю Аўтуховічу — 25 гадоў зьняволеньня (першыя 5 гадоў у турме, 20 гадоў — у калёніі строгага рэжыму), штраф 1000 базавых велічынь і пазбаўленьне званьня прапаршчыка ў адстаўцы.
  • Уладзімеру Гундару — 18 гадоў зьняволеньня ў калёніі ўзмоцненага рэжыму.
  • Паўлу Саву — 20 гадоў калёніі ўзмоцненага рэжыму.
  • Вользе Маёравай — 20 гадоў калёніі агульнага рэжыму.
  • Віктару Сьнегуру — 19 гадоў калёніі строгага рэжыму.
  • Галіне Дзербыш —20 гадоў калёніі агульнага рэжыму.
  • Любові Разановіч — 15 гадоў калёніі агульнага рэжыму.
  • Сяргею Разановічу — 16 гадоў калёніі ўзмоцненага рэжыму.
  • Павал Разановіч — 16 гадоў калёніі ўзмоцненага рэжыму.
  • Ірыне Мельхер — 17 гадоў калёніі агульнага рэжыму.
  • Ірыне Гарачкінай — 6 год і 1 месяц калёніі агульнага рэжыму.
  • Антону Мельхеру — 2,5 гады калёніі агульнага рэжыму.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG