Лінкі ўнівэрсальнага доступу

Вугоршчына настойвае на зьняцьці санкцый ЭЗ з трох расейскіх алігархаў


Сьцягі ЭЗ
Сьцягі ЭЗ

Вугоршчына пагражае перашкодзіць абнаўленьню часткі санкцыйных мер супраць Расеі, калі са сьпісу асоб, у дачыненьні да якіх дзейнічае забарона на выдачу візаў і актывы якіх замарожаныя, ня будуць выключаныя імёны трох алігархаў.

Гаворка ідзе аб абмежаваньнях, накладзеных больш як на тысячу чалавек з пачатку расейскага ваеннага ўварваньня ва Ўкраіну ў канцы лютага.

Як стала вядома Радыё Свабодная Эўропа/Радыё Свабода (RFE/RL) ад некалькіх дыпляматычных крыніц, знаёмых з сытуацыяй, Будапэшт настойвае на выдаленьні з санкцыйнага сьпісу Алішэра Ўсманава, Пятра Авэна і Віктара Рашнікава. Да 15 верасьня ў ЭЗ павінны прыняць рашэньне па санкцыях супраць Масквы на наступныя паўгода. У сераду на гэтым тыдні пытаньне будуць абмяркоўваць паслы краін-чальцоў эўрапейскага блёку.

Цяпер у санкцыйным сьпісе, рашэньні па якім могуць быць прынятыя толькі са згоды ўсіх дзяржаў ЭЗ, прозьвішчы 1217 чалавек, а таксама 108 юрыдычных асоб.

Алішэр Усманаў і Пётр Авэн знаходзяцца пад эўрапейскімі санкцыямі з канца лютага, калі афіцыйны часопіс ЭЗ назваў першага «пракрамлёўскім алігархам, які мае асабліва цесныя сувязі з расейскім прэзыдэнтам Уладзімірам Пуціным». Адзначалася, што Ўсманаў — адзін з тых, хто карыстаецца асаблівай павагай Пуціна і вырашае яго дзелавыя праблемы.

Авэн таксама быў названы блізкім да Крамля і адным з прыкладна 50 багатых расейскіх бізнэсмэнаў, якія рэгулярна сустракаюцца з Пуціным. «Ён ня дзейнічае незалежна ад волі прэзыдэнта», — падкрэсьліваюць у Брусэлі.

У сакавіку ў санкцыйны сьпіс трапіў Віктар Рашнікаў як уладальнік і кіраўнік рады дырэктараў Магнітагорскага мэталюргічнага камбінату (ММК) — аднаго з найбуйнейшых расейскіх падаткаплатнікаў і крыніц бюджэту.

Вугоршчына таксама настойвае на магчымасьці для гуманітарных арганізацый падтрымліваць сувязі зь некаторымі расейскімі банкамі, якія апынуліся пад санкцыямі. Мэдыякарпарацыя RFE/RL накіравала запыт уладам у Будапэшце, але ніхто з афіцыйных асоб пакуль не пракамэнтаваў інфармацыю ад крыніц.

  • Вугорскага прэм’ер-міністра Віктара Орбана называюць прарасейскім палітыкам. Ён крытыкаваў пазыцыю ЭЗ у дачыненьні да Масквы ў сувязі з канфліктам ва Ўкраіне, заяўляючы, што санкцыі, якія ўводзяцца, удараць па самім ЭЗ, але не аслабяць Расею і не дапамогуць Кіеву. Вугоршчына, сярод іншага, не ўхваліла заходнія ваенныя пастаўкі Ўкраіне праз сваю тэрыторыю.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG