Улады Катару высылаюць з краіны будаўнікоў стадыёнаў футбольнага чэмпіянату сьвету за пратэст супраць нявыплаты заробкаў

Чэмпіянат сьвету ў футболе адбудзецца ў Катары ў лістападзе. Для азіяцкай краіны міжнародная фэдэрацыя футбольных асацыяцый (FIFA) зрабіла выключэньне і дазволіла правядзеньне турніру позьняй восеньню, хаця раней чэмпіянаты праводзіліся выключна ўлетку. На будоўлях спартовых аб’ектаў рэгулярна гінулі рабочыя, аднак пытаньні да мераў бясьпекі засталіся.

Прынамсі 60 рабочых мітынгавалі ля офісаў Al Bandary International Group у Досе 14 жніўня — некаторым, як паведамляецца, не плацілі 7 месяцаў. Шэраг пратэстоўцаў затрымалі, некаторых дэпартавалі з краіны, хаця дакладная колькасьць высланых невядомая. Урад заявіў, што тыя, хто быў дэпартаваны, «парушылі законы бясьпекі», піша BBC.

Невядома, ці ўсе гэтыя рабочыя ўдзельнічалі ў будаўніцтве менавіта аб’ектаў да чэмпіянату сьвету, а ўлады замоўчваюць любую інфармацыю і не жадаюць адказваць на пытаньні журналістаў пра стан правоў рабочых.

ГЛЯДЗІЦЕ ТАКСАМА:

Віктар Лукашэнка ў Катары правёў перамовы з шэйхам-прэм’ерам, — мясцовыя СМІ. Менск маўчыць аб гэтай паездцы

Пры гэтым урад Катару заявіў, што выплаціць усе затрыманыя заробкі і дапамогі пацярпелым работнікам. А таксама паведаміў, што Al Bandary International Group знаходзіцца пад сьледзтвам за нявыплаты заробкаў. Сама група не адказала на журналісцкі запыт аб камэнтары.

Справу рабочых асьвятляе праваабарончая арганізацыя Equidem, якая спэцыялізуецца на правах рабочых. Кіраўнік арганізацыі Мустафа Кадры заявіў, што пратэставалі рабочыя з Бангладэш, Індыі, Нэпалу, Эгіпту і Філіпінаў.

«Ці можаце вы сабе ўявіць, наколькі адчайнымі павінны былі быць рабочыя, каб пратэставаць пры +42 градусах?! Яны не палітычныя дзеячы, яны проста хочуць, каб ім плацілі за іх працу», — дадаў Кадры.

ГЛЯДЗІЦЕ ТАКСАМА:

Экс-кіраўнікоў FIFA і UEFA Ёзэфа Блятэра і Мішэля Пляціні апраўдалі ў швайцарскім судзе

Усе гады, якія ідзе падрыхтоўка да футбольнага чэмпіянату сьвету, паведамлялася пра гібель рабочых на будаўнічых аб’ектах. Але ўлады так і не зрабілі цэнтралізаванага расьсьледаваньня таго, што адбываецца. Акрамя таго, праваабаронцы сыстэматычна заяўляюць пра парушэньні правоў чалавека ў Катары. Аднак у FIFA ў чарговы раз заявілі, што з правядзеньнем чэмпіянату сьвету ў Катары «няма маральных праблем».

ГЛЯДЗІЦЕ ТАКСАМА:

Кіраўнік Беларускай фэдэрацыі футболу рэгулярна наведвае Эўропу, нягледзячы на санкцыі і ранейшае затрыманьне ў Чэхіі