Лінкі ўнівэрсальнага доступу

Літоўскі вайсковы экспэрт: Новы этап міграцыйнага крызісу на мяжы Беларусі і ЭЗ чакаецца восеньню


26 лістапада 2021 году. Аляксандар Лукашэнка выступае перад мігрантамі ля памежнага пункту Брузгі. Ілюстрацыйнае фота.
26 лістапада 2021 году. Аляксандар Лукашэнка выступае перад мігрантамі ля памежнага пункту Брузгі. Ілюстрацыйнае фота.

Новы этап міграцыйнага крызісу на мяжы Беларусі і ЭЗ чакаецца восенню 2022 году. Такі прагноз у камэнтары BPN агучыў афіцэр запасу літоўскіх сіл спэцыяльнага прызначэньня Аўрымас Навіс.

Вайсковы экспэрт назваў крызіс «комплекснай апэрацыяй».

«Цяпер перасекчы мяжу спрабуюць выхадцы з Афрыкі і Азіі, якія, верагодна, пражывалі ў Расеі ці Беларусі. Але гэта ня тая хваля, якая прагназуецца на працягу найбліжэйшых месяцаў», — заўважыў ён.

На думку Навіса, «гібрыдная атака» закране, як летась, «у першую чаргу Літву, Польшчу і Латвію», а Беларусі «падрыхтавана роля пляцдарма для перавалкі мігрантаў, якіх выкарыстоўваюць як зброю».

«Цяпер успрымаць Беларусь як незалежную краіну, на жаль, не выпадае, — канстатаваў экспэрт. — Відавочна, што загады Менску паступаюць з Масквы, у тым ліку па арганізацыі канала нелегальнай міграцыі».

Асноўная хваля мігрантаў, якія будуць рабіць масаваныя спробы нелегальна перасекчы беларускую мяжу з Эўразьвязам, на яго думку, чакаецца позьняй восеньню — праз тэрыторыю Расеі.

Гэта будзе «гібрыдная вайна Расеі супраць Захаду», мяркуе Навіс, а «атака мігрантамі стане яе часткай».

«Крэмль паспрабуе выкарыстаць харчовы крызіс, інсьпіраваны ім жа (маецца на ўвазе блякаваньне паставак збожжа з Украіны. — BPN), для стварэньня напружанасьці ў краінах ЭЗ. Па меры набліжэньня голаду, бліжэй да зімы, гэта дазволіць накіраваць бежанцаў з Блізкага Ўсходу і іншых рэгіёнаў у Эўропу», — заявіў афіцэр запасу літоўскага спэцназу.

Як заўважыў экспэрт, выкарыстаньне мігрантаў можа стаць толькі часткай пляна, які, верагодна, будзе зьмяшчаць і поўнае спыненьне паставак газу ў краіны ЭЗ або адключэньне краін Балтыі ад сыстэмы БРЭЛЛ (сынхронны рэжым працы энэргетычных сыстэм Беларусі, Расеі, Літвы, Латвіі і Эстоніі — BPN).

Навіс упэўнены, што на дадзены момант урад Літвы недаацэньвае пагрозу зь мігрантамі: «У мяне з гэтай нагоды ўзьнікае адчуваньне дэжавю. За некалькі месяцаў да пачатку вайны ва Ўкраіне ў нас разважалі, колькі можа прыбыць бежанцаў у выпадку расейскай агрэсіі. Называлася лічба ў 4−5 тысяч чалавек. Я выказаў здагадку, што ня менш за 100 тысяч, і гэта пацьвердзілася. Толькі па афіцыйных дадзеных, у Літву прыбыло 77 тысяч украінцаў, але рэальная лічба істотна вышэйшая».

Пры гэтым ён ня лічыць інфраструктурныя рашэньні, у прыватнасьці, агароджу на польска-беларускай мяжы, вялікай перашкодай: «Мігрантаў утрымлівае ня плот, а людзі, якія абараняюць яго».

Летась у Літву трапілі 4 тысячы нелегальных мігрантаў, але калі іх будзе ў дзесяць разоў больш, заўважыў Навіс, гэта можа стаць сур’ёзным выклікам для краіны: «У нас няма столькі памежнікаў і сябраў Саюзу стралкоў (добраахвотніцкая ваенізаваная арганізацыя. — BPN), каб спыніць такую плынь людзей».

Пры вялікім наплыве мігрантаў гэта стане праблемай ня толькі для Польшчы і краін Балтыі, але і для іншых членаў ЭЗ, якія ўжо сутыкнуліся з эканамічнымі цяжкасьцямі з прычыны вайны ва Ўкраіне, лічыць экспэрт:

«Некаторы час падрыхтавацца да міграцыйнага нападу будзе, бо перамяшчэньне вялікай колькасьці людзей ня пройдзе незаўважаным для выведкі. Тэхнічныя магчымасьці дазволяць зафіксаваць пагрозьлівыя сыгналы да таго, як мігранты трапяць у Беларусь».

Асноўным матывам меркаваных «дзеяньняў Расеі» Навіс назваў помсту за прынцыповую пазыцыю Літвы і Польшчы:

«Яшчэ нядаўна востра стаяла пытаньне аб транзыце ў Калінінградзкую вобласьць. Не лічу супадзеньнем шэраг кібэратак на сайты ўраду Літвы, якія адбыліся ў гэты ж час».

  • Міграцыйны крызіс на мяжы Беларусі і краін ЭЗ пачаўся вясной 2021 году. Спачатку шматразовае павелічэньне колькасьці нелегальных мігрантаў адчула Літва. Пасьля таго як Вільня прыняла рашэньне не затрымліваць мігрантаў, а вяртаць у Беларусь, плыні нелегалаў пераарыентаваліся на Польшчу, а затым на Латвію.
  • Да пачатку вайны ва Ўкраіне міграцыйныя плыні істотна скараціліся, але пасьля зноў вырасьлі.
  • Кіраўніцтва дзяржаў Балтыі і Польшчы ўсклала адказнасьць за міграцыйны крызіс на мяжы на беларускія ўлады, тыя ў адказ назвалі прычынай крызісу дзеяньні Захаду ў краінах, адкуль прыбываюць мігранты.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG