Лінкі ўнівэрсальнага доступу

«Нават самалійскія піраты лепш экіпаваныя». Як беларусы Чэхіі зьбіраюць рыштунак для беларускіх добраахвотнікаў ва Ўкраіне


Рыштунак для беларускіх добраахвотнікаў
Рыштунак для беларускіх добраахвотнікаў

Беларусы Чэхіі зьбіраюць рыштунак для беларускіх добраахвотнікаў ва Ўкраіне. За некалькі дзён туды ўдалося перадаць некалькі дзясяткаў камплектаў. А ў плянах — сотні.

Каардынацыяй збору рыштунку займаецца Кірыл Якімовіч, сэртыфікаваны горны гід. Дзесяць гадоў таму ў яго была ўласная крама з вайсковымі таварамі, таму ён добра ведае, як і дзе здабываць такія рэчы. Гаворка не пра зброю, а пра іншыя рэчы, неабходныя ў зоне баявых дзеяньняў: вопратка, бронекамізэлькі, шлемы, аптэчкі і г. д. Гэта ўсё легальна і набываецца ў звычайных вайсковых крамах.

«За пару дзён беларусы Прагі сабралі $10 тысяч»

У першы дзень вайны Кірыл пачаў дапамагаць свайму ўкраінскаму сябру, які займаецца валянтэрствам для ўкраінскай арміі. Але ўжо неўзабаве яму давялося пераключыцца на беларускіх добраахвотнікаў.

«Я пабачыў у інтэрнэце здымак беларусаў ва Ўкраіне са зброяй. Там быў подпіс, што гэта беларускія добраахвотнікі. Яны былі ў звычайных джынсах, распранутыя. У аднаго левы накаленьнік, у іншага правы. Нават самалійскія піраты лепш экіпаваныя, чым некаторыя нашыя хлопцы», — кажа Кірыл.

Так ён вырашыў зьбіраць рыштунак для беларусаў сыстэмна.

«Я знайшоў куленепрабівальныя пласьціны, цэлую партыю выкупіў мой сябра, які мае на гэта грошы. Цяпер у нас іх больш за сотню. Пасьля мы паехалі зь ім у Нямеччыну на аптовы склад і прывезьлі цэлую фуру рыштунку на тыя грошы, якія сабралі людзі ў нашым чаце ў тэлеграме «Беларусы Прагі», а гэта недзе 10 тысяч даляраў», — расказвае Якімовіч.

«Нехта прынёс цеплавізар, нехта біноклі, прысмакі, нават піва»

Беларусы з Украіны даслалі ў Прагу табліцу са сваімі памерамі, і так Кірыл з калегамі пачалі зьбіраць камплекты.

Кірыл Якімовіч
Кірыл Якімовіч

«Кожны атрымае торбу, дзе напісаны ягоны пазыўны, там усё, ад шкарпэтак да цёплай курткі, уключаючы каску і бронекамізэльку. Падчас працэсу нас кансультаваў украінскі марпех, ён вэтэран і зьбіраецца на вайну ізноў. Таму ён канкрэтна мог сказаць, што прыдасца, а што не. Праскія беларусы аказаліся людзьмі заможнымі. Адзін чалавек прынёс цеплавізар, нехта біноклі, дык мы добра ўпакавалі камплекты. У тым ліку прысмакі, нават піва, напіхалі ўсяго і адвезьлі», — кажа Кірыл.

З Чэхіі гатовыя камплекты адправілі ў Польшчу. Там іх ужо чакалі сем беларускіх добраахвотнікаў. Пераапрануўшыся на месцы, яны рушылі ва Ўкраіну. Рэшта камплектаў таксама ўжо дабралася ва Ўкраіну.

«Калі прыяжджае беларус зь вялікім сэрцам, але ў джынсах і адным накаленьніку і бяз вопыту, то зброю дадуць ня нашым»

Кірыл Якімовіч кажа, што некаторыя беларускія добраахвотнікі едуць ва Ўкраіну практычна напаўголыя. А праблема ў тым, што на месцы практычна немагчыма знайсьці вайсковае абсталяваньне.

«Украіна дае аўтаматы, але найперш тым, хто ваяваў і мае ўласны рыштунак. Калі прыяжджае беларус зь вялікім сэрцам, але ў джынсах і адным накаленьніку і бяз вопыту, то зброю дадуць ня нашым, а ўкраінцам, якія ўжо ваявалі. А такіх 250 тысяч», — кажа праскі беларус.

Якімовіч тлумачыць, што беларусаў ніхто ва Ўкраіне ня будзе забясьпечваць камплектамі рыштунку. Украіна спачатку ўзбройвае ўласную армію, а пасьля легіён добраахвотнікаў. Ён прыводзіць у прыклад датчан ці брытанцаў, вэтэранаў вайны ў Афганістане, якія прыяжджаюць ва Ўкраіну ў рыштунку «з іголачкі».

«Ім толькі даюць зброю, і яны ідуць ваяваць. Гэта непараўнальна з нашымі. Таму я прашу, каб людзі спачатку думалі. Мы ўжо супрацоўнічаем з рознымі беларускімі ініцыятывамі. У адных ёсьць грошы, у іншых людзі, а ў нас ёсьць досьвед і лягістыка, каб усё набыць па танных коштах. Часам нават у чатыры разы таньней, чым у крамах», — расказвае Кірыл.

«Беларусы едуць туды і нічога ня хочуць слухаць. А пасьля пішуць у тэлеграм і просяць бронекамізэльку»

Поўны рыштунак, уключаючы бронекамізэльку і каску, для аднаго чалавека Якімовіч ацэньвае недзе ў 1000 эўра. Да гэтага трэба дадаць камплектацыю аптэчкі. Толькі за сродак Cloth, які спыняе кроў, трэба заплаціць амаль 80 даляраў.

Іншая задача — трэнінгі для добраахвотнікаў па мэдыцыне і тактыцы. Якімовіч кажа, што яны ўжо маюць такія прапановы ад польскіх і чэскіх вайскоўцаў, каб рабіць 7-гадзінныя трэнінгі па стандартах NATO.

«Але нашых добраахвотнікаў, як тую Пагоню, не спыніць і не стрымаць. Яны лятуць і нічога ня хочуць слухаць. А пасьля пішуць у тэлеграм і просяць бронекамізэльку, — расказвае Якімовіч. — Толькі што зрабіў заказ на 100 чалавек. Мы не пацягнем такую суму самі, але я разумею, што калі мы цяпер гэтага ня купім, то самі ўкраінцы нас апярэдзяць. Будзем плаціць па частках, калі што. Толькі што знайшоў 75 шлемаў у Гішпаніі, зараз будзем іх купляць пры дапамозе фонду BySol. Бо колькасьць беларусаў, якія хочуць ехаць ва Ўкраіну, ідзе ўжо на сотні. Нехта ўжо ўкамплектаваны. А кагосьці ўжо ўзброілі ўкраінцы. Але новым мы павінны дапамагчы. З грашыма абяцалі дапамагчы беларускія фонды. Хачу падзякаваць усім праскім беларусам і валянтэрам з Украіны, Расеі, Нямеччыны, Ізраілю, Францыі ды іншых краін, якія дапамагаюць нам грашамі, лягістыкай ды рэчамі».

Цяпер у плянах Кірыла і калегаў стварыць на тэрыторыі ЭЗ цэнтар са складам, дзе б беларускі добраахвотнік мог памераць рыштунак, перад тым як ехаць у зону баявых дзеяньняў.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG