Пра гэта расказаў сам перакладчык, паведамляе The Wall Street Journal.
Афганец Махамэд, чыё поўнае імя не раскрываецца, зьвярнуўся асабіста да кіраўніка Белага дома з просьбай эвакуаваць яго. «Добры дзень, спадар прэзыдэнт! Ратуйце мяне і маю сям'ю. Не пакідайце мяне тут», — сказаў Махамэд амэрыканскай газэце.
У 2008 годзе сэнатары Джо Байдэн, Чак Хэйгел і Джон Кэры ляцелі на верталётах над Афганістанам і вымушаныя былі прызямліцца ў адным з аддаленых рэгіёнаў краіны праз завіруху. Яны падалі сыгнал бяды, і адгукнуўся на яго менавіта Махамэд — мясцовы жыхар, які працаваў па кантракце з войскам ЗША ў якасьці перакладчыка. Пасьля яму давялося правесьці 30 гадзін на холадзе разам з амэрыканскімі вайскоўцамі і афганскімі сіламі бясьпекі, якія дапамагалі амэрыканскім кангрэсмэнам выбрацца зь бяды.
У аўторак прэс-сакратарка Белага дома Джэн Сакі, камэнтуючы просьбу Махамэда аб дапамозе, заявіла, што Злучаныя Штаты поўныя рашучасьці вывезьці яго і ягоную сямʼю з краіны. «Мы выцягнем вас. Мы цэнім вашу самаадданасьць», — сказала яна.
Махамэда павінны былі эвакуаваць разам з тысячамі іншых афганцаў, якія працавалі па кантракце з амэрыканскімі войскамі, аднак гэтага так і не ўдалося зрабіць: узьнікла затрымка з афармленьнем візы. На выхадзе з кабульскага аэрапорту Махамэд даведаўся, што выезд дазволены толькі яму аднаму, але не ягоным сямейнікам. Скончылася тым, што ўсе яны мусілі замкнуцца дома і хавацца ад талібаў. «Я не магу выйсьці з дома, — прыводзіць ягоныя словы The Wall Street Journal. — Я вельмі напалоханы».
- Да 31 жніўня ЗША завяршылі вывад войскаў з Афганістану. Скончыўся і асноўны этап эвакуацыі. Яе найбольш інтэнсіўная фаза доўжылася ўвесь апошні тыдзень жніўня. За гэты час амэрыканскія ўлады вывезьлі з краіны каля 120 тысяч афганскіх грамадзян — тых, хто працаваў зь сіламі НАТО, іх сямейнікаў, а таксама многіх іншых прадстаўнікоў уразьлівых катэгорый насельніцтва, якім пагражае расправа з боку Талібану.
