Дата дня
23 лютага 1935 году нарадзіўся Яўген Лугін, вайсковец, заснавальнік і кіраўнік Сялянскай партыі, удзельнік нацыянальна-дэмакратычнага руху 1980–1990-х гадоў.
Служачы ў савецкай армii, афіцэр беларус Яўген Лугін узяўся складаць праект канстытуцыі свабоднай краіны.
За гэта — бо падзяліўся запаветным зь сябрамі — і мусіў разьвітацца з вайсковай формай і пасьпяховай кар’ерай.
Аднак гонар афіцэра былы падпалкоўнік інжынэрна-сапэрных войскаў захаваў — гэтаксама, як і веру ў эўрапейскую прышласьць роднай краіны.
Спадар Яўген быў з тых, хто выпраменьвае перакананасьць у сваёй праўдзе.
Акурат такім я запамятаў яго на Ўстаноўчым зьезьдзе БНФ у Вільні, на сьвяткаваньнях Дня Волі й Чарнобыльскіх шляхах, на Дзядах ды іншых акцыях дэмакратычнае апазыцыі, пасьля якіх ён ня раз трапляў за краты.
Ён стаў адным з найактыўнейшых сяброў Згуртаваньня беларускіх вайскоўцаў, дзе адстойваў ідэю стварэньня прафэсійнае арміі й бязьядравасьці і нэўтральнасьці Беларусі.
Лугін любіў нашую зямлю і ў першасным значэньні гэтага слова. Пераадолеўшы дзясяткі бюракратычных бар’ераў, Яўген здолеў стварыць на бацькоўскай Глушчыне адну зь першых у краіне прыватных фэрмаў.
У Беларусі яго ведалі як заснавальніка й кіраўніка Сялянскай партыі, што мела на мэце абарону эканамічных інтарэсаў і палітычных правоў вяскоўцаў.
Адрозна ад некаторых паплечнікаў з дэмакратычнага лягеру, Лугін імкнуўся не да асабістай улады, а да шырокага аб’яднаньня партыяў і рухаў.
У адным з аўтографаў я напісаў яму, што ён, Лугін, зь ягонымі заўзятасьцю й зычлівасьцю, з талерантнасьцю й непахіснасьцю, з натуральнай багатай моваю, ёсьць для мяне ўвасабленьнем беларускага нацыянальнага характару.
Гэта выявілася й у яго жаданьні быць пахаваным у роднай глускай зямлі.
Уладзімер Арлоў, «Імёны Свабоды», 4-е выданьне , с. 570-571
Таксама ў гэты дзень
1563 — расейскія войскі на чале з царом Іванам IV пасьля аблогі ўзялі Полацк падчас Лівонскай вайны.
1866 — Аўстрыя і Прусія заключылі праскі мір, заклаўшы падмурак фармаваньня Нямеччыны.
1917 — пачатак Лютаўской рэвалюцыі ў Расеі.
1941 — упершыню атрыманы плютоній.
1944 — Сталін скасаваў Чачэна-Інгускую аўтаномную рэспубліку. Пачалося інтэрнаваньне соцень тысяч чачэнцаў і інгушоў у Сярэднюю Азію.
У гэты дзень нарадзіліся
1808 — Пётр Кірэеўскі, рускі публіцыст, архэоляг, фальклярыст, славянафіл.
1874 — Канстанцін Пятс, першы прэзыдэнт Эстоніі.
1878 — Казімір Малевіч, мастак, тэарэтык мастацтва, дызайнэр.
1891—Міхаіл Піятуховіч, беларускі літаратуразнаўца, крытык, пэдагог.
1907 — Станіслаў Станкевіч, беларускі літаратуразнаўца, грамадзкі дзеяч.
1929 — Алексій II, патрыярх Маскоўскі і ўсяе Русі.
1931 — Яўген Бабосаў, беларускі філёзаф.
1954 — Віктар Юшчанка, прэзыдэнт Украіны (2005 — 2010).
У памяці
1766 — Станіслаў Ляшчынскі, кароль польскі і вялікі князь літоўскі.
1855 — Карл Фрыдрых Гаус, нямецкі матэматык, астраном і фізык.
1864 — Людвік Зьвяждоўскі, вайсковец, адзін з кіраўнікоў нацыянальна-вызвольнага паўстаньня 1863–1864 гадоў, ахвяра расправы расейскіх калянізатараў.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў