«Вялікую размову з прэзыдэнтам» — сустрэчу Аляксандра Лукашэнкі з прадстаўнікамі грамадзкасці, СМІ і экспэртамі, — якая плянавалася на 12 сакавіка, перанесьлі на нявызначаны тэрмін.
Вось як у гутарцы з карэспандэнтам tut. by прычны патлумачыла прэс-сакратарка прэзыдэнта Натальля Эйсмант: «Калі ў сваім пытаньні вы намякаеце на адмену названага мерапрыемствы ў сувязі з распаўсюдам вірусу, то адкажу так: рэч ня толькі і ня столькі ў каранавірусе. Хаця пазыцыя прэзыдэнта ў гэтым пытаньні адназначная: шапказакідальніцтва і бестурботнага стаўленьня да сытуацыі быць не павінна, цяпер усім трэба быць вельмі акуратнымі».
Паводле Эйсмант, перанос «Вялікай размовы» зьвязаны з тым, што ў графіку Аляксандра Лукашэнкі накапілася шмат важных палітычных мерапрыемстваў.
«Гэта і зварот са штогадовым пасланьнем да народу і Нацыянальнага сходу, замежны візыт і сэрыя паездак па краіне, шэраг інтэрвію, якія ўжо сур’ёзна прапрацаваныя і абяцаныя вашым калегам. І калі гаварыць у цэлым, ёсьць ўстойлівае адчуваньне, што ў сувязі з пераносам зьмястоўная частка ня толькі не пацерпіць — тэмаў для размовы, мы ўпэўненыя, стане толькі больш», — сказала Натальля Эйсмант.
Летась падобная сустрэча з Аляксандрам Лукашэнкам доўжылася больш за сем гадзін, на ёй прысутнічалі больш за 200 удзельнікаў, але пытаньні пасьпелі задаць менш за трыццаць.
