Невядомы мужчына абрабаваў 10 студзеня аддзяленьне «Беларусбанку» ў пасёлку Бальшавік на Гомельшчыне.
Мужчына пагражаў прадметам, падобным да пісталета, скраў грошы і зьнік.
Зрабавана:
- 4000 беларускіх рублёў;
- 1000 даляраў (2115,9 беларускага рубля);
- 30 000 расейскіх рублёў (1037,76 беларускага рубля).
Прыкметы падазраванага: 30–40 гадоў, рост 180–190 сантымэтраў, шчыльнага целаскладу.
Быў апрануты ў чорную куртку з капюшонам, чорныя штаны, карычневыя чаравікі. Твар прыкрыў шалікам з чырвонымі палоскамі. Быў у пальчатках, з сабой меў пакет.
На Гомельшчыне ўвялі плян «Сырэна», на вышук рабаўніка накіравалі бліжэйшыя нарады міліцыі.
У паведамленьні прэс-сакратаркі Міністэрства ўнутраных спраў Вольгі Чамаданавай сьцьвярджаецца, што мужчына абрабаваў аддзяленьне аднаго з банкаў па вуліцы Савецкай. Пры гэтым у Бальшавіку на Гомельшчыне працуе толькі аддзяленьне Беларусбанку.
