Нямецкая паліцыя разам з францускай жандармэрыяй, чэскімі ўладамі, плятформай EMPACT і Эўраполам спыніла дзейнасьць злачыннай групы грамадзян Беларусі, якая абкрадала фуры, паведамляе Эўрапейскае паліцэйскае агенцтва (Эўрапол).
Група выкрадала грузы з фур, якія спыняліся на паркоўках і пляцоўках для адпачынку кіроўцаў.
Паводле Эўраполу, яны дзейнічалі ў асноўным уздоўж нямецкага аўтабану А7 непадалёк ад Гановэру, а таксама ў Францыі. Толькі ў адной Ніжняй Саксоніі яны падазраюцца амаль у 60 крадзяжах на суму больш як паўмільёна эўра.
У групе як найменей 6 беларусаў, паліцыя Ніжняй Саксоніі «вяла» яе ад 2018 году. Злодзеі мелі свае грузавікі, на якія перагружалі накрадзенае і вывозілі яго за мяжу. У кастрычніку сёлета частку групы затрымалі ў Нямеччыне з доказамі злачынства. Расьсьледаваньне працягваецца.