«Белінвэстбанк» павялічыў анансаваныя напярэдадні ліміты і адмяніў камісію на зьняцьцё гатоўкі з картак у касах.
«Белінвэстбанк» павялічыў месячны ліміт і адмяніў сутачны
Ад 2 траўня максымальная сума для зьняцьця наяўных у месяц для ўладальнікаў картак «Белінвэстбанку» будзе складаць:
- 5000 рублёў;
- 2500 даляраў ці эўра;
- 150 000 расейскіх рублёў.
Раней анансавалася, што без камісіі максымальна можна будзе здымаць 500 рублёў на дзень, а ў месяц 1500 рублёў, 600 даляраў або эўра і 45 000 расейскіх рублёў.
Калі кліент банку перавысіць ліміт, банк возьме камісію 0,5% у валюце рахунку — мінімум:
- 2 рублі;
- 3 даляры ці эўра;
- 30 расейскіх рублёў.
Анансаваную раней камісію за зьняцьцё наяўных грошай з карткі ў касе адмянілі, не пасьпеўшы ўвесьці ў дзеяньне.
Разам з тым банк не адступіўся ад свайго рашэньня браць камісію за прагляд балянсу ў банкаматах і інфакіёсках. 4-ы за месяц і кожны наступны прагляд будуць каштаваць:
- 25 капеек;
- 0,15 даляра ці эўра;
- 10 расейскіх рублёў.
Ліміты ў «Альфа-Банку» засталіся ранейшыя
Ад 1 траўня «Альфа-Банк» уводзіць месячныя ліміты на зьняцьцё ў сваіх банкаматах гатоўкі па картках, выпушчаных у межах «Набораў прывілеяў»:
- 5000 рублёў;
- 2500 даляраў ці эўра.
Ліміты на зьняцьцё наяўных з карткі «Альфа-Банку» ў банках-партнэрах складуць ад 100 да 600 рублёў у залежнасьці ад набору прывілеяў. Ліміты на наяўныя ў іншых банках будуць складаць ад 100 да 1200 рублёў.
Зьмены не закрануць кліентаў, якія абслугоўваюцца ў межах іншых праектаў.
