Палацавы комплекс Умястоўскіх у вёсцы Жамыслаў Івейскага раёну Горадзенскай вобласьці пачалі аднаўляць.
Палац быў унівэрсытэтам, нямецкай санаторыяй, калгаснай канторай
Палацава-паркавы комплекс Умястоўскіх пачалі будаваць у другой палове XVIII стагодзьдзя на беразе ракі Гаўя па аналёгіі з варшаўскім каралеўскім комплексам у Лазенках. Ён складаўся з палаца, дзьвюх афіцынаў паабапал яго, лядоўні, аранжарэі, манэжа, іншых гаспадарчых пабудоваў. Большасьць будынкаў да сёньня ацалела.
У XIX стагодзьдзі тут месьцілася навуковая база Віленскага ўнівэрсытэту. Падчас Першай усясьветнай вайны немцы стварылі ў ім санаторыю. Апошнім часам тут працавалі калгасная кантора, бібліятэка, клюб. У 2007-2008 гадах арганізацыі пераехалі, з тых часоў будынкі апусьцелі.
У 2012 годзе ў палацы здарыўся пажар, агонь зьнішчыў частку даху. У 2015 годзе комплекс набыў бізнэсовец зь Ярданіі, заплаціў задатак, а потым зьнік і не займаўся рэканструкцыяй.
Перакрываюць дах, каб будынкі не руйнаваліся далей
У жніўні 2017 году палацава-паркавы комплекс набыў беларускі бізнэсовец, які паходзіць зь мясьцін непадалёк ад Жамыслава. Апошнія паўтара года ўласьнік займаўся дакумэнтацыяй, рыхтаваў будаўнічыя матэрыялы, чысьціў парк побач з палацам. Нядаўна пачаліся аварыйна-аднаўленчыя работы.
Цяпер ліквідуюць наступствы пажару, робяць кроквенную сыстэму і часовы дах над палацам і афіцынай, каб вада не руйнавала будынкі далей. Для перакрыцьцяў выкарыстоўваюць тоўстыя бярвёны, якія рэдка можна знайсьці ў Беларусі.
Умовай аўкцыёну было стварэньне ў Жамыславе турыстычнага комплексу. Што дакладна тут зьявіцца, яшчэ вырашаецца. У адной з афіцынаў можа адкрыцца невялікі гатэль. Яшчэ ў адным будынку — кавярня. У палацы хочуць зрабіць залю для банкетаў.
Па папярэдніх падліках, на аднаўленьне комплексу можа спатрэбіцца каля 3 мільёнаў эўра.
Гэтая публікацыя падрыхтаваная пры выкарыстаньні інфармацыі БелаПАН.
