Міжнародная фэдэрацыя футболу (FIFA) забараніла расейскай сьпявачцы Юліі Чычэрынай выступаць у Растове-на-Доне на фэстывалі заўзятараў чэмпіянату сьвету (ЧС-2018).
Пра гэта паведаміла сама Юлія Чычэрына, апублікаваўшы ў «Фэйсбуку» фатаздымак ліста, напісанага ад імя мэнэджара FIFA Fan Fest ў Расеі Кацярыны Саўчанкі.
У лісьце гаворыцца, што на футбольных мерапрыемствах пад эгідай FIFA забаронена закранаць палітычныя, ваенныя і рэлігійныя тэмы.
«Гэтая сьпявачка асацыюецца з ваеннай тэмай, нават калі ня будзе выконваць песьняў пра вайну на фэстывалі», — напісана ў лісьце.
Міжнародная фэдэрацыя заклапочаная магчымай нэгатыўнай рэакцыяй у СМІ і наступнымі рэпутацыйнымі рызыкамі для FIFA праз выступ Чычэрынай на ваенныя тэмы. У прыватнасьці, у лісьце дадзеная спасылка на кліп песьні «На перадавой», якую сьпявачка прысьвяціла «абаронцам Данбасу».
«Дзякуй Богу, футболабандэраўцы забаранілі мяне ў Растове-таце, за сотню кілямэтраў ад якога ў шматпакутнай Горлаўцы дзеці спяць у ваннах, каб іх уначы не пасеклі аскепкамі», — пракамэнтавала сытуацыю Чычэрына.
Прадстаўнік Юліі Чычэрынай Алег Гененфельд пацьвердзіў РБК сапраўднасьць дакумэнту. У FIFA сытуацыю пакуль не пракамэнтавалі.
У Чычэрынай ёсьць некалькі песень пра канфлікт на ўсходзе Ўкраіны, яна падтрымлівае самаабвешчаныя «ДНР» і «ЛНР» і ня раз выступала з канцэртамі на Данбасе. У 2015 годзе Служба бясьпекі Ўкраіны абвясьціла яе ў вышук. У 2017 годзе ёй выдалі пашпарт «ЛНР».
У Растове-на-Доне пройдуць чатыры гульні групавога этапу чэмпіянату сьвету ў футболе і матч 1/8 фіналу кубка.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў