Бакі канфлікту ў Лібіі дамовіліся аб пачатку мірнага ўрэгуляваньня сытуацыі ў краіне. У рамках сумеснай дэклярацыі яны абавязаліся падрыхтаваць канстытуцыйную базу для правядзеньня прэзыдэнцкіх і парлямэнцкіх выбараў, а таксама аб’яднаньня дзейнасьці дзьвюх супрацьлеглых урадаў. Самі выбары папярэдне намечаны на 10 сьнежня.
Дамоўленасьці былі дасягнуты на міжнароднай канфэрэнцыі ў Парыжы. Перамовы праводзіліся пад эгідай ААН і пад старшынствам прэзыдэнта Францыі Эманюэля Макрона. Францускі лідэр назваў падпісанае сёньня пагадненьне «вырашальным крокам» для мірнага ўрэгуляваньня лібійскага канфлікту.
Пасьля забойства лібійскага лідэра Муамара Кадафі ў 2011 годе ў краіне ўзьнікла два часовыя ўрады: Урад нацыянальнага згоды ў Трыпалі на чале з Фаізам Сараджам і «усходні кабінэт міністраў» Абдалы Абдурахмана аты-Таня ў Тобруку, які падтрымлівае Лібійскую нацыянальную армію пад камандаваньнем Халіфы Хафтара.