Лінкі ўнівэрсальнага доступу

Расейскія аналітыкі: няма падставаў разьлічваць на рост беларускай эканомікі 


Прамысловасьць Беларусі, ілюстрацыйнае фота

У Беларусі адсутнічаюць фактары, здольныя істотна паскорыць рост эканомікі ў 2018 годзе. Такая выснова прыводзіцца ў эканамічным аглядзе, падрыхтаваным Цэнтрам макраэканамічных дасьледаваньняў расейскага «Сбербанка».

Беларускія ўлады заплянавалі на гэты год паскарэньне росту ВУП да 3,5%. У той жа час банкаўскія аналітыкі лічаць, што перадумоваў для такога разьвіцьця падзеяў няма.

«Мы ня бачым фактараў, якія маглі б аказаць істотную падтрымку эканамічнаму паскарэньню у 2018 годзе. Паводле нашых ацэнак, рост ВУП па выніках году складзе каля 2,2% і будзе абмежаваны назапашанымі структурнымі праблемамі ў беларускай эканоміцы», — цытуе вытрымку з агляду агенцтва БелаПАН.

Сярод іншага расейскія экспэрты адзначаюць, што беларускія ўлады дагэтуль ня вырашылі пытаньня вельмі неэфэктыўнага і неапраўдана вялікага дзяржсэктару. Пры гэтым яны сумняваюцца, што беларускія ўлады гатовыя ісьці на такія рэформы.

«Рэформа дзяржсэктара застаецца найважнейшай задачай, якая ў выпадку рэалізацыі створыць падмурак для стабільнага доўгатэрміновага росту. З другога боку, рэформа будзе патрабаваць ад уладаў жорсткіх крокаў, зьвязаных зь неабходнасьцю банкруцтва нерэнтабельных прадпрыемстваў са спадарожным скарачэньнем пэрсаналу ды іншых непапулярных захадаў», — падкрэсьліваюць аўтары.

У сьнежні 2017 году выканаўчая рада Міжнароднага валютнага фонду настойліва рэкамендавала беларускім уладам праводзіць структурныя рэформы.

«Выканаўчыя дырэктары фонду заклікалі афіцыйныя органы Беларусі выкарыстаць момант аднаўленьня эканомікі для правядзеньня паглыбленых і паскораных рэформаў у рэальным сэктары для падвышэньня прадукцыйнасьці, тэмпаў росту і ўстойлівасьці эканомікі да ўзрушэньняў. Яны адзначылі выключную важнасьць рэформы сэктару дзяржаўных прадпрыемстваў для дасягненьня гэтых мэтаў», — падкрэсьліваецца ў заяве рады.

Ваша меркаваньне

Паказаць камэнтары

XS
SM
MD
LG