Лінкі ўнівэрсальнага доступу

На генэральнага пракурора Ўкраіны Юрыя Луцэнку завялі справу аб незаконным узбагачэньні


Генэральны пракурор Украіны Юры Луцэнка

Нацыянальнае антыкарупцыйнае бюро Ўкраіны (НАБУ) завяло крымінальную справу на генэральнага пракурора Ўкраіны Юрыя Луцэнку.

Справу адкрылі па факце магчымага незаконнага ўзбагачэньня «службовай асобай, якая займае асабліва адказны пост»(Артыкул 368–2 Крымінальнага кодэксу Ўкраіны).

Прэс-сакратар НАБУ Сьвятлана Аліфіра паведаміла, што адпаведнае рашэньне прыняў Саломенскі раённы суд Кіеву ў кастрычніку.

Былы намесьнік генэральнага пракурора Рэнат Кузьмін заявіў у Фэйсбуку, што справа на Луцэнка (ужо пятая, паводле падлікаў Кузьміна) была заведзеная паводле яго звароту. Адначасова стала вядома, што Генэральная пракуратура, якую ўзначальвае Луцэнка, распачала крымінальную вытворчасьць у дачыненьні да дырэктара НАБУ Арцёма Сытніка, які падазраецца ў разгалашэньні сьледчай інфармацыі. Вытворчасьць была заведзеная на падставе апублікаванага ў інтэрнэце аўдыёзапісу, дзе чалавек з голасам падобным да Сытніка распавядае журналістам дэталі некаторых рэзанансных спраў.

****

Юры Луцэнка быў міністрам унутраных справаў Украіны пры Віктары Юшчанку ад лютага 2005 году па сьнежань 2006 і ад сьнежня 2007 па студзень 2010. Пры прэзыдэнцтве Віктара Януковіча 26 сьнежня 2010 году ён быў арыштаваны Генэральнай пракуратурай Украіны па абвінавачаньні ў растраце дзяржаўных сродкаў у асабліва буйных памерах.

У лютым 2012 году суд прызнаў яго вінаватым і прысудзіў да 4 гадоў пазбаўленьня волі з канфіскацыяй усёй ягонай маёмасьці. Праз паўгода, 17 жніўня 2012, Пячэрскі раённы суд Кіева прызнаў Луцэнка вінаватым яшчэ па адной крымінальнай справе, па абвінавачаньні ў халатнасьці пры апэратыўна-вышуковых захадах у рамках расьсьледаваньня атручаньня Віктара Юшчанкі. Па гэтай справе Луцэнка атрымаў 2 гады пазбаўленьня волі.

Аднак ужо ў красавіку 2013 года Луцэнка быў вызвалены пасьля таго, як Януковіч яго памілаваў. 12 траўня 2016 году, ужо пры прэзыдэнцтве Пятра Парашэнкі, Луцэнка стаў генэральным пракурорам Украіны.

Ваша меркаваньне

Паказаць камэнтары

XS
SM
MD
LG