Лінкі ўнівэрсальнага доступу

Літва закупляе нарвэскія сыстэмы СПА


Міністэрства абароны Літвы вырашыла закупіць нарвэскія сыстэмы супрацьпаветранай абароны сярэдняй далёкасьці NASAMS. Набыцьцё, якое абыдзецца больш як на 100 млн. эўра, мае запоўніць адзін з найбуйнейшых прабелаў у абароне Літвы, паведамляе delfi.lt.

«Служба абаронных рэсурсаў Міністэрства абароны ўхваліла гэтае набыцьцё, дамова будзе падпісаная праз два тыдні», — паведаміла BNS прадстаўніца міністра для сувязяў з грамадзкасьцю і прэсай Віта Раманаускайце.

Кошт закупу яна не камэнтавала.

У апублікаваным на гэтым тыдні праекце дзяржаўнага бюджэту намячаецца, што ў бліжэйшыя тры гады на набыцьцё і мадэрнізацыю сыстэмаў СПА сярэдняй далёкасьці ў цэлым будзе выдзелена 122 млн. 379 тыс. эўра, прыблізна па роўных частках у 2018, 2019 і 2020 гадах.

Раней паведамлялася, што літоўская армія мусіць быць забясьпечаная гэтымі сыстэмамі да 2020 году. Паветраная абарона — адно з самых слабых месцаў краінаў Балтыі ў вайсковым сэнсе. Літва, Латвія і Эстонія цяпер валодаюць толькі сыстэмамі супрацьпаветранай абароны малой далёкасьці, яны здольныя зьнішчаць аб’екты на адлегласьці 3-5 кілямэтраў.

Нарвэскія ракетныя комплексы могуць ляцець некалькі дзясяткаў кілямэтраў і зьбіваць цэлі на вышыні 15 кілямэтраў.

З мэтай гарантыі бясьпекі паветранай прасторы на трэцім этапе краінам Балтыі спатрэбіцца шчыт СПА вялікі далёкасьці, такі, як ракетныя комплексы Patriot. Гэтым летам ЗША ўпершыню дыслякавалі такія ракеты ў Літве на час вучэньняў. Спэцыялісты ў сфэры абароны разглядаюць магчымасьць таго, што літоўскую паветраную прастору маглі б пакрываць сыстэмы Patriot, якія плянуе набыць Польшча.

У наступным годзе, паводле плянаў, літоўскі абаронны бюджэт мае дасягнуць натаўскага стандарту — 2% ад ВУП, гэта значыць у выпадку Літвы 873 млн. эўра.

XS
SM
MD
LG