Лінкі ўнівэрсальнага доступу

Wikileaks здаў беларускіх апазыцыянэраў Лукашэнку — The New Yorker


Заснавальнік WikiLeaks Джуліян Асандж

Прэзыдэнт Беларусі Аляксандр Лукашэнка выкарыстаў сакрэтныя матэрыялы з сайту WikiLeaks для арышту прадстаўнікоў беларускай апазыцыі ў 2010 годзе. Аб гэтым амэрыканскі часопіс The New Yorker сьцьвярджае ў публікацыі, прысьвечанай заснавальніку WikiLeaks Джуліяну Асанджу.

Паводле выданьня, у 2010 годзе швэдзкі грамадзянін Ісраэль Шамір, які выступаў куратарам публікацыяў сакрэтнай карэспандэнцыі амэрыканскіх дыпляматаў з сайту WikiLeaks у постсавецкіх мэдыях, атрымаў ад Джуліяна Асанджа 80 тысяч сакрэтных дэпэшаў. Частку зь іх ён, як сьцьвярджае The New Yorker, перадаў для публікацыі ў пракрамлёўскі расейскі часопіс, а іншую частку — прэзыдэнту Беларусі.

Паведамляецца, што Аляксандар Лукашэнка выкарыстаў атрыманую інфармацыю з WikiLeaks для арышту беларускіх апазыцыянэраў, хоць сам Шамір назваў гэта «зламыснымі прыдумкамі нядобразычліўцаў».

The New Yorker піша, што супрацоўнікі WikiLeaks у Вялікай Брытаніі даведаліся пра інцыдэнт, калі беларускія актывісты зьвярнуліся да іх у паніцы. Некаторыя хацелі дасьледаваць сытуацыю, аднак Асандж загадаў падначаленым адмаўляць наяўнасьць у Шаміра інфармацыі.

Шамір сустракаўся з Макеем

У 2010 годзе тагачасны кіраўнік адміністрацыі Аляксандра Лукашэнкі Ўладзімір Макей сустракаўся з Ісраэлем Шамірам, які прыбыў у Беларусь для назіраньня за прэзыдэнцкімі выбарамі. Акурат напярэдадні была апублікаваная частка так званага «беларускага дасье» Wikileaks, і Аляксандар Лукашэнка на выбарчым участку №1 у менскім Унівэрсытэце фізкультуры абвяргаў зьвесткі пра сябе, як пра самага багатага зь беларускіх алігархаў, а таксама аспрэчваў дэпэшы амэрыканскіх дыпляматаў, якія перадавалі зьмест гутарак Лукашэнкі з прадстаўнікамі заходніх дзяржаваў.

«Што тычыцца замежных дзяржаваў, запэўніваю, што я вельмі асьцярожны і ахайны, калі ідуць канфідэнцыйныя перамовы», заявіў тады Аляксандар Лукашэнка.

У прэзыдэнцкай адміністрацыі нічога не паведамлялі пра зьмест гутаркі Макея і Шаміра. На наступны дзень у Беларусі была жорстка разагнаная масавая акцыя пратэсту супраць фальсыфікацыі выбараў, затрыманыя больш як 600 чалавек, арыштаваныя 7 кандыдатаў у прэзыдэнты.

Праваабаронцы патрабавалі адказаць, ці сапраўды афіцыйны Менск атрымаў адпаведныя матэрыялы. Адказаў ад Асанджа на гэтыя пытаньні не было.

Яшчэ адно сьведчаньне

У 2011 годзе брытанская Guardian апублікавала ліст былога супрацоўніка WikiLeaks Джэймса Бола, які распавёў, што Ісраэль Шамір спыніў супрацу з парталам, завалодаўшы вялікай колькасьцю нерэдагаваных амэрыканскіх дыпляматычных дэпэшаў. Бол настойваў, каб партал асудзіў Шаміра, аднак на загад Асанджа WikiLeaks проста адмежаваўся ад былога супрацоўніка.

Ваша меркаваньне

Паказаць камэнтары

XS
SM
MD
LG