Лінкі ўнівэрсальнага доступу

Ужо сёньня: дзень народзінаў Антона Шукелойця


Разьвітаньне з Антонам Шукелойцям, студзень 2017

Падзеі 19 ліпеня ў беларускай і сусьветнай гісторыі.

Дата дня

19 ліпеня 1915 году нарадзіўся Антон Шукелойць, беларускі грамадзкі дзяяч у ЗША. Пасьля далучэньня Заходняй Беларусі да БССР у 1939 годзе Шукелойць працаваў настаўнікам на Ашмяншчыне. Арганізаваў у Ашмянах першую беларускую сярэднюю школу, настаўніцкія курсы і каля 90 беларускіх школ на тэрыторыі былога Ашмянскага павету.

Падчас нацысцкай акупацыі Шукелойць працаваў у аддзеле асьветы і культуры Менскай гарадзкой управы, затым стаў загадчыкам Беларускага гістарычнага музэя. З 1944 году жыў у эміграцыі. Быў актыўным ўдзельнікам жыцьця беларускай дыяспары ў ЗША. Памёр 7 студзеня 2017 году.

Таксама ў гэты дзень

1930 — па абвінавачаньні ў прыналежнасьці да «Саюзу вызваленьня Беларусі» арыштаваны Максім Гарэцкі.

1972 — Івану Мележу і Івану Шамякіну прысвоены званьні народных пісьменьнікаў Беларусі.

1988 — у Віцебску пабудаваны летні амфітэатар. Менавіта тут штогод праводзіцца «Славянскі базар у Віцебску».

1994 — прэзыдэнтам Украіны стаў Леанід Кучма.

У гэты дзень нарадзіліся

1869 — Лявон Вітан-Дубейкаўскі, беларускі архітэктар, пэдагог і грамадзкі дзяяч.

1893 — Уладзімер Маякоўскі, расейскі савецкі паэт.

У памяці

1855 — памёр Тамаш Зан, беларускі і польскі паэт-рамантык, удзельнік рэвалюцыйнага руху.

XS
SM
MD
LG