Усяго 10 ваенных канфліктаў сталі прычынай 80 адсоткаў гібелі мірнага насельніцтва ва ўсім сьвеце, згодна з новым дакладам, апублікаваным у аўторак.
Новае дасьледаваньне ваенных канфліктаў, праведзенае Міжнародным інстытутам стратэгічных дасьледаваньняў (IISS), дакладвае, што мірныя жыхары працягваюць пакутаваць ад войнаў і лякальных сутыкненьняў па ўсім сьвеце.
Вайна ў Сырыі пяты год запар застаецца самым кровапралітным канфліктам, згодна з дакладам. Другое месца, нечакана, заняла Мэксыка, дзе барацьба з крымінальнымі картэлямі забрала 23 тысячы чалавечых жыцьцяў у мінулым годзе.
«Колькасьць ахвяр канфлікту ў Мэксыцы пераўзыходзіць колькасьць ахвяраў у Афганістане і Самалі», — паведаміў Джон Чыпман, кіраўнік Міжнароднага інстытуту стратэгічных дасьледаваньняў.
Акрамя Сырыі і Мэксікі, самыя кровапралітныя канфлікты працягваюцца ў Іраку, Афганістане, Емэне, Самалі, Судане, Турцыі, Паўднёвым Судане і Нігэрыі.
