Лінкі ўнівэрсальнага доступу

За бэрлінскім тэрарыстам сачылі некалькі месяцаў, але не арыштавалі з прычыны браку доказаў


У Нямеччыне сьледчыя знайшлі адбіткі пальцаў падазраванага ў тэракце ў Бэрліне тунісца Аніса Амры на дзьвярах грузавіка, на якім ён задавіў людзей на калядным кірмашы. Пра гэта ў чацьвер паведамляе газэта Süddeutscher Zeitung.

Нямецкія спэцслужбы на працягу месяцаў сачылі за падазраваным з прычыны ягоных сувязяў з ісламістамі. Паводле інфармацыі штотыднёвіка Der Spiegel, падазраваны прапаноўваў сябе ісламісцкім групоўкам у ролі сьмяротніка яшчэ некалькі месяцаў таму. Яго не затрымалі празь недахоп доказаў.

Амры прыбыў у Нямеччыну з хваляй уцекачоў у ліпені 2015 году, але ў чэрвені сёлета ягонае прашэньне аб прытулку адхілілі. Улады не змаглі яго дэпартаваць з прычыны адсутнасьці сапраўдных дакумэнтаў. Тунісец выкарыстоўваў некалькі фальшывых пашпартоў з рознымі імёнамі.

У панядзелак увечары грузавік заехаў у натоўп, які сабраўся на калядным кірмашы каля вуліцы Курфюрстэндам ў Бэрліне. Загінулі 12 чалавек, 48 — атрымалі раненьні. Адказнасьць за напад узяла на сябе групоўка «Ісламская дзяржава».

Вам можа яшчэ спадабацца

XS
SM
MD
LG