Расейскі вайскова-транспартны верталёт Мі-8 быў зьбіты ў выніку абстрэлу зь зямлі ў сырыйскай правінцыі Ідліб, паведамілі ў прэс-службе Мінабароны Расеі.
Паводле апошніх зьвестак, загінулі ўсе пяць чалавек, якія знаходзіліся на борце.
Міністэрства абароны дадало, што верталёт вяртаўся на авіябазу Хмэймім пасьля дастаўкі гуманітарнай дапамогі ў горад Алепа.
Як паведаміў прэс-сакратар прэзыдэнта Расеі Дзьмітры Пяскоў, расейцы, якія знаходзіліся ў верталёце, загінулі гераічна, таму што «спрабавалі адвесьці машыну з тым, каб мінімізаваць ахвяры на зямлі».
Ніводная з ваюючых ў Сырыі груповак пакуль не ўзяла на сябе адказнасьць за зьнішчэньне верталёта.
Як паведамляе тэлеканал Аль-Джазіра, расейскія вайсковыя самалёты 1 жніўня нанесьлі некалькі авіяўдараў у тым раёне, дзе быў зьбіты верталёт, аднак афіцыйнага пацьверджання гэтай інфармацыі няма.
Сырыйскія праваабаронцы і мясцовыя жыхары раней неаднаразова вінавацілі расейскую авіяцыю ў бамбаваньні жылых кварталаў Алепа, за які вядуцца баі паміж войскамі сырыйскага прэзыдэнта Башара Асада і аддзеламі ўзброенай апазыцыі.
Самае папулярнае
1