Да 70-годзьдзя Перамогі маскоўскія ўлады вырашылі захапіць праніклую ў Маскву групоўку цацачных «фрыцаў» часоў Другой сусьветнай вайны.
Маскоўскае ўпраўленьне Сьледчага камітэту ўзбудзіла крымінальную справу па факце продажу ў маскоўскай «Цэнтральнай дзіцячай краме на Лубянцы» цацачных салдацікаў з нацысцкай сымболікай. Прадстаўнік камітэту паведаміла журналістам, што сьледчыя «адбіраюць» з гандлю салдацікаў ў форме нацысцкай Германіі. Сьледчыя таксама праводзяць допыты і ператрусы ў прадаўцоў.
Кампанія «Галс-Дэвэлапмэнт», якая кіруе «Цэнтральнай дзіцячай крамай на Лубянцы», адмовілася браць на сябе адказнасьць за асартымэнт прадаваных тавараў. Аднак прадстаўніца гэтай кампаніі пацьвердзіла радыёстанцыі «Эхо Москвы», што бюсты і фігуркі салдат нацысцкай Германіі былі прыбраныя з прылаўкаў і выключаныя з продажу.
