На бульвар, які нядаўна названы імём Грахоўскага, сёньня прыйшло шмат людзей. Перад уваходам у гарадзкі парк была адкрытая мэмарыяльная дошка “выдатнаму беларускаму паэту і празаіку, ганароваму грамадзяніну горада Глуска, зь якім зьвязанае ўсё яго жыцьцё”. Сяргей Грахоўскі памёр летась, ён не дажыў году да свайго 90-гадовага юбілею.
У глускім кінатэатры “Арэон” прайшла вечарына, прысьвечаная памяці пісьменьніка. На ёй выступілі сваякі Грахоўскага, а таксама пісьменьніца Вольга Іпатава і літаратуразнаўца Лідзія Савік, якія распавялі пра ягонае жыцьцё і творчасьць.
Вядома, што Сяргей Грахоўскі быў абвінавачаны савецкімі ўладамі ў нацыяналізме і дваццаць гадоў правёў у сталінскіх лягерах і ссылцы.
Музэй памяці пісьменьніка цяпер ствараецца ў школе № 1 раённага цэнтру, дзе ён вучыўся. Улады Глуска абвесьцілі ў часе сёньняшніх урачыстасьцяў, што гэтай школе афіцыйна нададзенае імя Сяргея Грахоўскага.