Газэта “Беларускі каапэратар”, 1923 год, допіс Назіральніка “Па заслугах і плата” пад рубрыкай “Трыбуна чытача”:
“У нас у мястэчку Грэск існуе каапэратыў, сябры праўленьня якога на працягу некаторага часу настолькі рупліва працавалі для ўласнай выгады, што кралі, што называецца, абсалютна ўсё, што толькі не пішчыць. 5 красавіка справа разьбіралася ў Нарсудзе гораду Слуцку. У выніку старшыню Праўленьня гр.Ярошыка і сакратара гр.Наруцкага прыгаварылі да трохгадовага заключэньня з пазбаўленьнем грамадзянскіх правоў на 5 гадоў, і сябра Праўленьня гр.Мяцельскага на 1 год умоўна. Так суровая рука Рабоча-Сялянскага рэвалюцыйнага суду карае ілжэкаапэратараў, якія пад сьцягам служэньня грамадзтву імкнуцца набіць сабе машну за кошт працоўных мас насельніцтва”.
Газэта “Сталинская молодежь”, цяперашняя “Знамя юности”, 1953 год, пад рубрыкай “Новыя кнігі”:
“Дзяржаўнае выдавецтва БССР выпусьціла ў сьвет наступныя кнігі і брашуры па сельскай гаспадарцы. С.Хробастаў. Трактарная брыгада МТС у калгасе. На беларускай мове. Наклад 10000. Т.Салтановіч, Б.Роземблюм, Ф.Карытнік. Дасягненьні і рэзэрвы калгасу імя Кірава Аршанскага раёну. На беларускай мове. Наклад 10000. В.Рубан. За перадавую агратэхніку ільна-далгунца. На беларускай мове. Наклад 10000. Т.Бязьдзенка. Шкоднікі і хваробы тэхнічных культур у БССР і меры барацьбы зь імі. На беларускай мове. Наклад 10000. П.Пракаповіч, А.Абрамчук. Пустазельле і меры барацьбы зь ім у калгасах БССР. На беларускай мове. Наклад 10000”.
Шклоўская раённая газэта “Ўдарны фронт”, 1983 год, артыкул “Ідэалягічнае забесьпячэньне сяўбы” загадчыка аддзелу прапаганды і агітацыі райкаму П.Лапцёнка:
“Веснавое поле кліча агітатара. Кліча на справу надзвычайнай важнасьці, якой для земляроба заўсёды зьяўляецца пасяўная. Разам з усімі ўдзельнікамі сяўбы неабходна, каб выйшлі ў поле і камісары, у абавязак якіх уваходзіць арганізацыя ўсёй масава-палітычнай работы па сяўбе, ажыцьцяўленьне паўсядзённага кіраўніцтва сацыялістычнага спаборніцтва, каардынацыя дзейнасьці агітатараў і палітінфарматараў”.
