Арабскі тэлеканал Аль-Джазіра агучыў аўдыёстужку, якая прыпісваецца аднаму з кіраўнікоў тэрарыстычнай сеткі Аль-Каіда Айману аль-Завахіры. Апошні зьвяртаецца да пакістанцаў з заклікам зрынуць прэзыдэнта Пэрвеза Мушарафа, паколькі ён працуе на карысьць Амэрыкі.
ЦРУ вывучае аўдыёзапіс з мэтай высьветліць, ці сапраўды ён зроблены аль-Завахіры.
Пакістанскі ўрад пакуль ніяк не адкамэнтаваў гэтую стужку. Пакістанскія вайскоўцы другі тыдзень змагаюцца з баевікамі Аль-Каіды ў гарах уздоўж мяжы з Аўганістанам.
Не выключаецца, што аль-Завахіры знаходзіцца там жа.
Мінабароны ЗША плянуе накіраваць у Аўганістан дадатковыя 2000 сваіх марскіх пэхацінцаў.