Прэпарат “Аскафэн П”, ці яго аналяг “Параскафэн”, прадаецца амаль у кожнай беларускай аптэцы. У менскай аптэцы на вуліцы Якуба Коласа фармацэўты кажуць, што ўжываньне “Параскафэну” ня можа мець небясьпечных наступстваў, бо гэта звычайны прэпарат супраць болю, у яго склад уваходзяць парацэтамол і асьпірын.
(Аптэкарка: ) “Гэта той жа самы “Аскафэн”, толькі беларускі “Параскафэн”. 150 рублёў”.
У Латвіі “Аскафэн П” каштаваў таксама вельмі танна — дзесяць таблетак за 10 сантымаў, гэта прыкладна пятая частка даляра. Як паведаміла сёньня для Радыё Свабода прэсавая сакратарка Міністэрства аховы здароўя Латвіі Зайга Барвіда, на сёньняшні дзень у выніку ўжываньня “Асакафэну П” у Латвіі пацярпелі 23 чалавекі.
(Барвіда: ) “Тры чалавекі трапілі ў шпіталь на мінулым тыдні. Яны былі ў коме. Цяпер ужо нармальна сябе адчуваюць. Ачунялі пасьля інтэнсіўнага лекаваньня. Наша эпідэміялягічнае дасьледаваньне паказала, што ўсе трапілі ў шпіталь з прычыны гіпаглікеміі (паніжанага ўтрыманьня цукру ў крыві), і ўсе яны ўжывалі “Аскафэн П” — некаторыя часта, некаторыя выпілі толькі адну таблетку, і ім стала дрэнна. Мы разглядалі розныя вэрсіі, але ў выніку было высьветлена, што ў леках утрымлівалася рэчыва, якога там не павінна быць”.
Сярод пацярпелых у асноўным жанчыны немаладога веку, але ёсьць і некалькі маладых мужчынаў. Прадстаўніца Міністэрства аховы здароўя Латвіі Зайга Барвіда кажа, што да прадпрыемства “Белмэдпрэпараты” празь міністэрства замежных справаў Латвіі будуць выстаўленыя патрабаваньні аб кампэнсацыі.
(Барвіда: ) “Гэты прэпарат пастаўляецца на наш рынак ужо гадоў дзесяць, і дагэтуль такіх праблемаў не было. Мы прапанавалі людзям здаць гэтыя лекі й папярэджвалі, што яны небясьпечныя для здароўя. Мы абмяркоўваем гэта зь беларускай амбасадай у Латвіі. Кіраўнік “Белмэдпрэпаратаў” спадар Гаўрылаў даслаў нам факс, што ён гарантуе, што гэты прэпарат якасны, што вытворчы працэс не мяняўся, што рэчывы-складнікі набытыя там жа, дзе і раней, што ўсё на вышэйшым узроўні, і што нічога такога быць ня можа”.
Паводле прадстаўніцы міністэрства аховы здароўя Латвіі Зайгі Барвіды, гісторыя зь беларускімі лекамі выклікала ў Латвіі шырокі розгалас. Неўзабаве ў Рыгу накіруецца кіраўнік прадпрыемства “Белмэдпрэпараты” Міхаіл Гаўрылаў, каб на месцы высьветліць сытуацыю. А як паведаміў ён сёньня для Радыё Свабода, дагэтуль незразумела, як такое магло адбыцца.
(Гаўрылаў: ) “Наша пастаўка, мы шмат гадоў ужо гэты прэпарат вырабляем, і ніколі не было такіх пытаньняў. Мы ў сябе ўсе ўзоры праверылі, яны ўсе нармальныя. Правялі службовае дасьледаваньне ў цэху. Мы гэты прэпарат рабілі ў верасьні. “Аскафэн” выраблялі ў студзені. Уся субстанцыя была выпрацаваная, паводле справаздачаў усё было чыста, усе рэшткі праверылі, рэшткаў не было. Можна толькі меркаваць… Адно зь меркаваньняў наступнае. Мог быць тэарэтычна акт напярэдадні ўваходу Латвіі ў Эўразьвяз. Пастаўкі нашых лекаў будуць прыпыненыя, таму што патрабуецца выкананьне патрабаваньняў GMP(прынятых у сьвеце правілаў вытворчасьці лекаў). Пасьля, зразумела, на рынку зьнікнуць танныя лекі. І можа, каб падрыхтаваць грамадзкую думку, і была зробленая нейкая такая акцыя”.
Паводле Міхаіла Гаўрылава, магло здарыцца і так, што людзі ў Латвіі набылі падробку пад маркай “Белмэдпрэпаратаў”. Дарэчы, пра магчымасьць незаконных паставак прэпарату “Аскафэн П” заявіла сёньня галоўны спэцыяліст упраўленьня замежнаэканамічных сувязяў і паставак канцэрну “Белбіяфарм” Сьвятлана Гаворская:
(Гаворская: ) “Увоз лекавых сродкаў дазволены, толькі калі ён дазволены GMP. Ёсьць нязначныя пастаўкі ў Латвію толькі паводле старых кантрактаў. Усё астатняе ўвозіцца іншым чынам. І дадзены “Аскафэн П” быў таксама ўвезены… Мы цяпер высьвятляем, як трапіла менавіта гэтыя сэрыя, якая не прайшла кантролю. Гэты не пайшло законным чынам”.
Імпарт у Латвію “Аскафэну П” цяпер забаронены да высьвятленьня абставінаў справы. Да таго ж, аптэчны дэпартамэнт Эстоніі таксама заявіў аб забароне продажу гэтага беларускага прэпарату як небясьпечнага для здароўя.
